Vanglaini palaiin political party hrang hrang hruaitute a kawmnaah MNF, Congress, ZPM leh PC party-te chuan MLA by-election hi chuh ngei an tum thu an sawi a, BJP erawh chuan thutlukna an la siam lo tih an sawi. ZPM, MNF leh Congress-te chuan inthlanah hian hnehna an chan ngei an beisei vek a, PC party erawh chuan chak an inbeisei lo.

MNF vice president Vanlalzawma chuan by-election atan candidate an la siam loh thu Vanglaini a hrilh a, "Inthlan dawn chuan candidate siam turin nomination committee kan siam ṭhin a, tun ṭum inthlan tur atan kan la siam lo. Chuvangin, tu nge kan candidate dawn tih hriat theih a la ni lo," a ti.

Vanlalzawma chuan, Serchhip biala MLA by-election turah an party candidate chu tu pawh ni se, hnehna chang turin beiseina sang tak an neih thu a sawi.

Congress party pawhin by-election atan candidate tur an la tifel lo nia thu dawn a ni. Hetih lai hian, zawhna chhángin MPCC treasurer Zodintluanga Ralte chuan, hnehna an chan ngei an inrin thu Vanglaini palai a hrilh.

Zodintluanga chuan, Serchhip bial chu an party president a din char char ngamna a nih thu sawiin, "Inthlan hnuhnungah hnehna chang zo lo mah ila kan party mite erawhin min la chhuahsan chuang lo. Kum hnih chhunga MNF sorkar kal dan mipuiin an hmu a, an ring ngam tawh lo. Chuvangin, inthlan lo awm turah hian hnehna kan chan ngei kan ring," a ti.

ZPM party hruaitute chuan, Serchhip biala by-election neih turah hian inthlan hnuhnung bera thlan tlin Lalduhoma, MNF MLA 12-te'n an hêk hnua MLA aṭanga bàn tak chu a din nawn leh tur thu an puang tawh.

Vanglaini palai zawhna chhangin ZPM vice president Dr Kenneth Chawngliana chuan hnehna an chan ngei a rin thu sawiin, "Inthlan hnuhnung berah MNF phei chuan vote sang chuangin min thlau a, Congress kha Chief Minister nilai an rawn candidate vangin tlemin an rawn pawng deuh a nimai. Tunah chuan MNF chetdan avangin a hmaa kan candidate vote lo pawhin vote an tum tawh," a ti.

PC party vice president V Lalṭhazuala chuan Vanglaini zawhna chhángin, thutlukna la siam lo mah se, an party office bearer ṭhukhawmin candidate neih ngei ṭha an tih thu a sawi a, "Kan party mite'n an duh tak an vote theih nan candidate kan siam ngeiin ka ring," a ti. Inthlanah beisei nei sang lo mah se, nakin zela an party tan candidate neih ngei a ṭhat thu a sawi.

Vanglaini palai zawhna chhangin BJP vice president LR Colney chuan, Assembly by-election awm turah candidate siam leh siam loh an la ngaihtuah lo niin a sawi a, "Boruak thlír chungin thutlukna kan siam ang," a ti.

Serchhip biala MLA by-election buatsaih hun tur hi Election Commission of India chuan a la puang lo. Serchhip bialtu MLA Lalduhoma chu November 27, 2020 khan MLA aṭangin speaker Lalrinliana Sailo chuan a bàn a, Assembly Secretariat-in December 3, 2020 khan notification tichhuakin, Serchhip constituency chu bial ruakah a puang. By-election hi bial ruaka puan a nih aṭanga thla ruk chhunga buatsaih tur a ni.