Bawngkawn aṭanga Phunchawng inkar Kawng dung thenfai hnatlang buatsaih

Urban Development & Poverty Alleviation (UDPA) department huaihawtin, nimin khan Bawngkawn aṭanga Phunchawng inkar kawngpui dung thenfai hnatlang buatsaih a ni a, UDPA changtu deputy chief minister Tawnluia'n a hmanpui.

Ch. Saprawnga Truck Terminal-a hnatlang hawnna inkhawmah Tawnluia chuan, fainaa hlawhtling tura a bul ṭanna tur chu chhungkuaah a nih thu sawiin, "Chhungkaw tinte'n mawhphurhna pawimawh tak kan nei. Bawlhhlawh hi a siamtu chu keimahni kan ni a, a senghawitu tur pawh keimahni tho kan ni tih kan inhriat a ngai. Hei hi chhungkua aṭanga kan inzirtir thar leh ṭheuh a ṭul," a ti a; fai leh bawlhhlawh senghawi kawnga hmasawnna chu rilrua tuh ngheh a pawimawh thu a sawi.

Dy. Chief Minister chuan, Tuirialah bawlhhlawh ṭawih thei leh ṭawih thei lo sâwngbâwl mek a nih thu sawiin, "He hmalakna hi chhawr ṭangkai a, a thawktute hna thawh tiawlsam turin chhung tinte'n in lamah bawlhhlawh thliar hran kan ngaih pawimawh a ngai. Faina chungchanga zirtirna kawngpui dunga sign board tam taka târ mekte leh khawlaia bawlhhlawh báwm hùnte pawh venghimtu kan nih zel a ṭul," a ti. 

Khawpui hmélhmang mawi leh mawi lohah kawtchhuah kawngpui dunga awmte'n mawhphurhna sang tak an nei tih sawiin Tawnluia chuan, "Airport panna kawngpui dunga awmte pawhin mikhualte mithmuha Aizawl khawpui lan mawina thuahte chanvo pawimawh tak an nei. Faina kawngah theihtawp chhuah zel turin ṭan an lâk a ngai," a ti a; kawngpui hmangtute pawhin fainaah kawng dunga awmte an thlàwp tlat a ngai thu a sawi.

AMC commissioner K Laldingliana  pawhin thu sawiin, faina kawngah Mizote'n hma an sawn thu a sawi a, "Hmasawnna tur erawh a la tam. Bawlhhlawh paih tih kan rilrua awm hi bawlhhlawh senghawi tia kan thlâk a ngai. Bawlhhlawh báwm awm lohna hmuna bawlhhlawhte pawh bawlhhlawh báwm thlen nacháng kan hriat a, lirthei aṭanga kawngpuia bawlhhlawh theh chhuah mai ṭhin pawh sim a ngai," a ti.

Hnatlangah hian UDPA, AMC, SIPMIU, Aizawl Smart City Ltd., kawngpuiin a paltlang veng local council huam chhunga mite leh tlawmngai pawl Clean & Green Revolution aṭangin mi 400 vel an thawk chhuak a ni.

Hnatlang hawnna inkhawm hi UDPA secretary Dr C Vanlalramsanga'n a kaihruai a; Aizawl West-I bialtu MLA Zothantluanga leh Aizawl North-III bialtu MLA C Lalmuanpuia te pawh an tel.

Inkhawma tarlan danin, ni khata Aizawl khawpuia bawlhhlawh lâk khawm chu kg. 1,35,000 a tling deuh ziaha chhût a ni. Tunah hian AMC chuan bawlhhlawh la khawm turin lirthei laihâwl (MMV) 78 chuang leh lirthei lian chi (HMV) 78 chuang ni tin an hmang a, bawlhhlawh senghawi nan kum khatah cheng nuai 100 chuang sèn a ni.