IOC-in lawmman hrang hrang an sem

Indian Oil Corporation Ltd. (IOC) chuan Mizoram hmun hrang hranga petrol pump-a tuialhthei latu zinga mi vannei mi panga hnenah nimin khan Lalnghakliana Filling Station-ah lawmman chi hrang hrang an sem a; Food, Civil Supplies & Consumer Affairs (FCSCA) director Dr Lalhriatzuali'n a hmanpui.

Dr Lalhriatzuali chuan, IOC-in an consumer-te tana hamṭhatna an buatsaih chu ṭha a tih thu sawiin, "IOC leh Mizoram sorkarin thawh dunna ṭha tak kan nei. Covid-19 vanga harsatna thleng leh tun hnaia Mizoram kawngpui dan vanga oil leh gas-a harsatna thlengah pawh IOC hian Manipur lama an outlet-a mi phurh dan Mizoram sorkar an ruahmanpui a, a lawmawm hle a ni," a ti.

FCSCA Director chuan, tuialhthei pawlh dal awm ṭhin leh eirawngbawlna gas bûk tling lo, khawih chingpen awm ṭhin chu tihreh a nih theih nan sorkar leh tlawmngai pawlte'n theihtawp an chhuah reng chungin an hre vek sêng lo tih a sawi a; tuialhthei ṭha leh gas bûk tling ngei mipuiin an lâk theih nan sorkar vènpui turin mi tin a sáwm.

IOC hian nikum khan 'Festive Season Dhamaka' siamin, IOC tuialhthei latu petrol pump-te dawrtu, mobile SMS hmanga thawn dan tur an tiha thawnte aṭangin lawmman dawng tur thlan a ni a; Mizoram hmun hrang hranga IOC supply petrol pump-ah kalpui a ni. Lawmman pakhatnain TVS bike, pahnihnain LED TV, pathumnain laptop, palinain washing machine leh panganain gas burner an dawng.