MNF candidate-te thlang turin sáwm

MNF vice president Lalthlengliana chuan, Mizote tan Mizo hnam party-a awm a inhmeh thu sawiin, AMC inthlan turah MNF candidate-te thlang tling turin mipui a sáwm.

Nimina Bethlehem Vengthlang YMA Hall-ah AMC Ward-XVI campaign hawnnaah thu sawiin Lalthlengliana chuan, "AMC inthlan awm turah hian sang takin hnehna kan chang ngei ang tih ka beisei," a ti a; MNF candidate-te vote turin mipui a sáwm a ni.

Lalthlengliana chuan, AMC inthlan turah an khingpui tur Congress leh ZPM-te chu an chaurau hle nia sawiin, "Pathian leh mipui zarah hnehna sang takin MNF candidate-te hi kan tling ngei dawn a ni. MNF hi party dang nen patla khata bûk chi kan ni lo a, kan danglam bik a ni," a ti.

MNF Vice President chuan, MNF-te'n India do lo ta se, tun thlengin Mizoram chu state-ah a la awm a rin loh thu sawiin, "MNF chu ram neitu kan ni kum khua dawn. Politics-ah full stop a awm ngai lo. Mizo kan nih chuan Mizo hnam party MNF-ah i awm mai ang u," a ti a; party dangte'n 'Pathian leh kan ram tan' an tih ve loh thu a sawi.

AMC Ward XVI-a MNF candidate tur C Lalremmawii pawhin thu sawiin, "Candidate siam dawn khan party dang neuh neuh inléngte pawh kan nei ve a, mahse, MNF hi kei leh ka chhungte'n kan ṭawngṭainaah kan thlan a ni a, Pathian min dahna a ni ngeiin ka hria. Thlan tlin ka nih chuan ward mipui tan theihtawp tak meuh ka chhuah ang," a ti.