KHAWTHLIR

Mizoram Presbyterian Kohhrana pastor leh probationary pastor, awmna bial insawnte chu naktuk Pathianni hian an awmna tur bialah lâk luhna inkhawm (induction service) neihpui an ni dawn. Pastor leh pro. pastor insawn zinga a tam zawk chu naktukah lâk luh theih beisei a ni a; state páwn aṭanga Mizoram chhûnga insawn tur zinga pastor 11 leh pro. pastor pahnih erawh chu inkhung rih ngai an nih avangin January 17-ah lak luh tura ruahman a ni.

Kolasib District Magistrate chuan nimin khan thuchhuah a siam a, Mizoram sorkarin Covid-19 chungchanga inkaihhruaina dan a siam chu tihdanglam a la ni loh avangin, dan thar siam/tihchhuah a nih hma chuan kalphung pangngai anga kal zel tur a nih thu a tarlang.

Lunglei District Screening Committee on PMAY/HFA hotute an chairman V Lalsangliana, bawrhsap hoa January 6, 2020-a ṭhukhawm chuan, 3rd DPR - Lunglei hnuaiah in sak ṭanpuina dawng turin Lungleia chhungkaw 526 an pawm a, Tlabung 2nd DPR hnuaiah chhungkaw 150 an pawm bawk.

Nimin khan State Referral Hospital-ah Covid-19 vei mi pakhat dah luh a ni a, ani nen hripui vei vangin SRH-ah mi 18 enkawl mek an ni. SRH-ZMC Bulletin tarlan danin, mi pahnih chu ICU-ah enkawl mek an ni a, pakhat chu ventilator nena enkawl niin, pakhat dang pawh oxygen pek a ni. Isolation ward-ah mi 16 an awm a, an zinga pahnih chu oxygen an mamawh mek. SRH-a awm mek mi 18 zingah kum 60 chung lam panga leh kum 14 hnuai lam pakhat an tel a ni.

Rural Development department secretariat-a thawkte chuan nimin khan kum 2021 atana inhlan tharna hun an hmang a, RD minister Lalruatkima'n a hmanpui a, Covid-19 léng karah ni 100 inhlawhna siam a nih thu sawiin, hriatna tihpun leh technology changkang zawkin a kenpuite man pha tura ṭan la zel turin thawktute a fuih.