AMC inthlan leh MLA by-election-ah ZPM kan chak ngei ka ring - Lalduhoma

ZPM leader Lalduhoma chuan, Aizawl Municipal Corporation (AMC) inthlan leh Serchhip biala Assembly by-election awm turah ZPM party an chak ngei a rin thu a sawi.

Nimina Tuikum constituency chhunga khaw pahnih - Darlawng leh Phulmawi khuaa mi thar lawm luhna inkhawmah Lalduhoma chuan, Mizorama by-election-ah eptu lam an la tling ngai mang lo tih sawiin, "Tun ṭum by-election tur hi chu a dan a dang a, MLA aṭanga min bàn chhan leh by-election a ngaih chhan hi mipuite'n an theihnghilh ka ring lo. AMC inthlan leh by-election awm turah hian kan chak ngei ka ring," a ti.

Lalduhoma sawi danin, kum 1982-a Phuldungsei biala by-election-ah Remna Tichhetute Bânna (RTB) hmangin MLA ni lai chu Lungphun khuaa thah a nih avangin opposition candidate Liansuama thlan tlin a lo ni tawh a ni.

Politics-a a awm tawh chinah Congress party president aṭanga a bàn chhan chu a chhuan berte zinga mi a nih thu sawiin Duhoma chuan, "MNF unaute zalenna sual avangin kan khua min hâlsak a, kan hmeichhiate an pawngsual a. MNF lo haw duh tawh, haw thei si lo kha koh haw a, remna siampui ka duh avangin Congress president ka nihna ka bànsan a, MP ka nihna pawh min paih dawn tih hre sa ka ni," a ti.

Lalduhoma chuan, "Zalenna sual tawh lo MNF sipai rammú, hrehawm taka awmte ka lainat avangin Central Minister min tiam mah se, MNF leh Zoram mipui tan ka MP nihna ka hlân a ni. Kan unaute'n remna leh muanna hnuaia an lo chhuah theihna tura ka beihna kha ka nuna ka chhuan berte zinga mi a ni," a ti a; chutih lai chuan sum leh pái an nei lo a, an retheih phah thu a sawi.

Tunah erawh chuan, muangleiah MNF-te'n rem leh rem loin MLA aṭanga bàntir dan an ngaihtuah tih sawiin Lalduhoma chuan, "MNF tana ka inpekna zawng zawngte kha kum 30 a ral meuh chuan an hotute'n an theihnghilh ta a ni ang, vawiinah chuan hmelma enin min en a, MLA ka lo ni ve ṭâwk ṭawkte chu hnawk tiin min theh chhuak ta a ni," a ti.

ZPM Leader chuan, MLA aṭanga bàn a nih chhan chu dan ngaih pawimawh vang a ni lo tih sawiin, "House-ah hnawksak min tih vang liau liau a ni. Ka politics zinkawng hi a bumboh ve hle a, mahse, ka vui reng reng lo a, Zoram tana ka hmathlirte pawh a danglam phah reng reng lo," a ti a; Mizoram tan a au zel dawn tih a sawi.

Lalduhoma sawi danin, MNF an sorkar hnuin SEDP atan cheng vbc. 1,500 dah an tum laiin vbc. 750 an dah a, kum 2020-21 atan vbc. 513 an dah leh bawk. Normal SEDP atana an dah chu cheng vbc. 135 chiah a ni a, chu chu Rs. 3,00,000 zelin sem dawn se, chhungkaw 4,500 vel chauhin an chang thei dawn a ni.

ZPM thuchhuah chuan, Phulmawi leh Darlawngah hian nimin khan an party zawm thar eng emaw zat an lawm lut tih an tarlang a; Tuikum biala ZPM member-te'n MLA aṭanga bàn Lalduhoma thlahualna atana an thawh khawm Rs. 41,810 chu Lalduhoma hnenah an hlân tih an tarlang bawk.