Saitual DC office complex tur lungphùm Chief Minister-in a phúm

Chief minister Zoramthanga chuan nimin khan Saitual DC office complex tur lungphùm a phúm a, Horticulture pisa thar a hawng bawk. CM hi bialtu MLA R Lalzirliana, minister-in a ṭawiawm.

CM Zoramthanga chuan, Covid-19 hripuiin sorkar hmalakna tam tak tiṭhuanawp mah se, a theih ang angin sorkarin ruahmanna a siam tawhte bawhzui a nih thu a sawi a, "District office complex siam tum a nih chhan chu, hmun khata department office hrang hrangte an awm khawm chuan office dàwrtu mipui tan a awlsam phah dawn a ni," a ti.

Saitual district chuan horticulture lama hmasawnna atan theihna ṭha tak nei a ni tih department mithiamte'n an sawi thu tarlangin Zoramthanga chuan, "Vawiina DHO office hawn thar pawh ṭangkai taka chhawr a nih ka beisei," a ti. Saitual khawpui chu ṭhang zel tur a ni tih rilruah pâi reng chungin, khaw hmasawn zel dan turah ruahmannna felfai 

tak nei turin mipui a chah.

R Lalzirliana pawhin thu sawiin, Saitual district chu district puitlinga hlankai a nih a, hna thawk theia siam a nih hnuah hmasawnna thar hmuh tur a awm zel tih sawiin, "Mizoram sorkarin district thar pathuma district office complex siamna tur cheng vbc. 10 ṭheuh a ruahman hi a lawmawm hle a ni," a ti.