Health Care Scheme sum siamna atan Hman tum an awm - MSHCS CEO

Mizoram State Health Care Society hotute chuan, Mizoram State Health Care Scheme (MSHCS) chu sum siamna atana hman tum an awm ṭhin niin an sawi a; private hospital zingah sorkar rate mil loa bill siam ṭhin an awm thu an sawi bawk.

MSHCS chief executive officer (CEO) Dr Biakthansangi chuan Vanglaini palai zawhna chhángin, mi tam takin dik taka bill an siam ṭhin laiin, mi tlem azawng chhui zui ngai an awm ṭhin tih a sawi a, "Bill an rawn thehluh leh an inenkawlna senso (cash memo) inthlau lutuk te, sum siamna atana hman tum tih hriat taka damlohna ho tham tak taka bill thehlut ṭeuh ṭhinte leh inenkawlna leh bill inzawmna nei lote an awm. Chu'ngte chu kan chhui zui ṭhin," a ti a; an chhui chian hnua bill hnâwl a awm nual thu a sawi.

Dr Biakthansangi chuan, MSHCS hnuaia bill theih zat sorkarin rate a siam anga bill siam lo private hospital an awm nual thu sawiin, "Chu'ngte chu sorkar rate angin kan lo siam rem mai ṭhin a, an bill siam dan a inang lo nual a, a ṭhen chu 15%-te kan cut a, a ṭhen chu 5% chauhte kan cut," a ti.

MSHCS CEO chuan, "Bill dan dik lo awm zeuh ṭhin tih loh chu kan pe vek a, chutih laiin, kum khat atana an chan pual Rs. 2,00,000 an bill zo tawh tih hre loa bill thehlut chhunzawm an awm fo bawk," a ti a; Rs. 2,00,000 hmang zo tawhte chu an hrilhfiah a, an pe chhunzawm ngai lo tih a sawi.

MSHCS 2020-21 atan inziah luh hun chu December 31, 2020-ah a tàwp tih sawiin Dr Biakthansangi chuan, "Mi ṭhenkhat chu an damloh chauhin inziah luh an tum ṭhin a, hei hi a buaithlak ṭhin khawp mai," a ti a; inziah luh hun laia inziak lut lote chu kum dang angin hun an hawnsak tawh dawn loh thu a sawi a ni.