Heroin vangin kuminah mi 2 thi tawh

Excise & Narcotics department (END) chuan, kumin January thla hman tawh chinah heroin gram 278 an man tawh thu leh, heroin kaihhnawihah mi pahnih, mipa kum 41 ve ve an thih tawh thu an tarlang.

END press statement tarlan danin, Aizawla END thawkte chuan nimin khan Phunchawng leh Rangvamual chhehvelah dan loa zu siam dap beihpui an thlâk a; zu siamna hmun eng emaw zat an tihchhiat bakah, zu siamna bungbél tam tham tak an man.

Champhaia END enforcement pawhin January 7, Ningani zing dar 8 khan Champhai Zote dáiah heroin gram 203 (hawng 15) leh a neitua puh Thanglanchin (41) s/o Chinkhantuala, Fártlang, Myanmar nia inchhál an man bawk. The Narcotic Drugs & Psychotropic Substances Act, 1985 tlawhchhanin thubuai an ziak lut a, Thanglanchin chu Court-ah thawn nghalin, Champhai District Jail-ah dah luh a ni.

END chuan, Covid-19 lockdown thlah zalen hnuah Mizoramah heroin a pung deuha a lan thu tarlangin, "A zutu leh a hmang khawlo leh thihpui pawh an pung. Hetianga ruihhlo zuar leh hmang khawlote dap chhuah kawngah dan kengkawhtu Excise & Narcotics leh Police-te theihtawpa ṭawiawm turin mi tin kan ngen a ni," an ti.

END tarlan danin, heroin hi India rama ruihhlo khuahkhirhna danpui NDPS Act, 1985 tlawhchhana khap leh khuahkhirh a ni a, a bawhchhiate chu kum 20 thleng tàntir leh Rs. 2,00,000 thleng chawitir theih an ni. NDPS Act bawhchhe ngun deuhte chu thih thlenga hrem theih a ni bawk.