Lei hnuai tui verh chhuahna tlawh

Agriculture minister C Lalrinsanga chuan nimin khan Serchhip bul, Mat lui kama Mualvawm zaua thlai châwmna tur, lei hnuaia tui verh chhuah thar a tlawh a, Chawmzau Ground Water Project thawhna tur hmun a fang nghal.

Loneitute nen Farmer Training Hall-a an inkawmnaah Minister chuan, sik leh sá inthlakin Mizoram pawh a nghawng ve zel tih sawiin, "Chu harsatna sutkian nana hmalakna pawimawh chu, thlai châwmna atan lei hnuaia tui verh chhuah a ni. Lei hnuai tui siak chhuah hna hi Mat phaia thlai chíngtute tan lian tham takin kalpui a ni dawn," a ti.

Agriculture Minister hian Mizoramah PMKSY hmanga Ground Water Irrigation project 13, cheng nuai 1604.89 sênna tur leh ram hectare 553 châwmna tur kalpui a nih tur thu te, Mat phai bik tan pawh NABARD sum cheng nuai 227.15 sêngin hmun 31-ah tui verh chhuah tum a nih thute a sawi bawk.

Inkawmnaa tarlan danin, Mat phaia thlai chíngtute hman turin hmun 31-ah tui verh chhuahna siam tum a ni a; chuta tan chuan NABARD aṭangin cheng nuai 227.15 hmuh ni tawhin, sum hman phalna nghah mek a ni.