Laipui mu a ṭang ṭha bawk a, vawi nga ngawt mai ring takin a puak - Arsenal chuan an mikhualna ramah Sporting Lisbon chu 5-1 in an sawp, tlak hniam deuh lai han nei ve zauh mah se tunah chuan an tho chhuak leh ta!
Thawhlehni zan Estadio Jose Alvalade-a inkhelah Gunners tan hian Gabriel Martinelli, Kai Havertz, Gabriel, Bukayo Saka leh Leandro Trossard ten goal khat ṭheuh an khung a, mualneitu lam tana Goncalo Inacio khungin awmzia a nei phak lo.
Laipui a puak
Inkhelh banah goal a khung bakah a ṭhiante khung tur siamsaktu Saka chuan, "Kan nihna ang tak kan lantir," tiin a sawi a, inkhel hmuhnawm chhawp chhuak chunga goal tam tak khung chu Arsenal nihna dik takniah a ngai hmiah.
Mikel Arteta-a'n kar tawp Premier League inkhel lama a hahdam tir Declan Rice leh Kai Havertz ten inkhel bul an ṭan a, captain Martin Odegaard chuan tlarhma lam puiin a duh tawkin a tal kual vel thei leh tawh bawk.
Ruben Amorim-a kalsan tak Sporting an che thei lo, minute sarihna lekah Martinelli chuan Jurrien Timber-a siamsak a khung ṭan a, a hnuah chuan a khat mawi tawkin goal kan hmu chhunzawm.
Havertz-a'n hnai tak aṭangin a khung, a siamsaktu chu Saka niin England international hian penalty aṭangin a khung ve bawk. Rice-a corner pet chu defender Gabriel-a'n tauh lutin, goal hnuhnung ber chu Liandro Trossard-a tauh luh a ni thung.
Ngelnghet a ngai
Vawi khat khelh fuh hluai vanga champion ngawt theih a ni lo, a tawpa nomawi chawitu ni tur chuan hun rei tak chhung ṭha taka khel thei nih a pawimawh - Mikel Arteta pawhin he thil hi a hmu chiang a, a naute chu ngelnghet taka khel turin a duh.
Arsenal manager Arteta chuan, "Inelna lianah team ṭha tak kan hmachhawn a, hetiang zata kan chak thei a nih chuan kan khel ṭha hle tihna a ni. Ka naute khan thil tum mumal tak nei chungin match an khel, a tawpah a rah chhuah kan hmu.
"Nomawi lian leh hlu tak kan chawi duh a nih chuan ngelnghet taka khelh reng theih a pawimawh," a ti. Inkhel tawp hmain Rice, Martinelli leh Odegaard te a la chhuak daih a, kar tawpa West Ham nen Premier League an khelh tur a ngaipawimawh tih a lang.
North London club hian khualmuala Champions League an khelh hnuhnung pangaah chak ni hmel an hmu lo a, an record duhawm lo tak hi Sporting lakah an thaibo - Portuguese club tan tun season atan an chak lohna hmasa ber a ni hial.
Sporting an tlawm
Ruben Amorim khan team nghet leh ṭha tak a din a, anmahni khelmualah bik phei chuan kum khat chuang tlawm loin an kaltluang thei. Amorim enkawl lai kha chuan Manchester City meuh pawh 4-1 in an hneh thei hial.
Mahse, Amorim a chhuak a, thil a danglam dawn tih chu a chiang ta reng mai. Tun season tir aṭanga chhiarin inelna hrang hrangah match 17 chhung tlawm loin an kaltluang a, tunah erawh Arteta leh a nauten an tihtawpsak.
Man City laka hattrick siamtu Viktor Gyokeres chu mipui en hlawh ni mah se Saliba leh Gabriel te hmaah a che thei lo a, a tharum leh tlan chakna hmangin hlauhawm taka ball tlanpui chang nei mah se a hmawr a bawk thei lo.
Sporting hi an chhe ta duai tihna erawh a ni bik lo - Gunners goalkeeper David Raya tan hna hautak an siamsak fo a, an vanneih ṭum chu ni se Gyokeres, Geovany Quenda leh Morten Hjulmand ten remchang an nei vek, mahse an ṭum fuh lo ni an tawng a ni.