Punjab-in Mumbai an sawp!

Indian Super League-ah Thawhlehni zan khan inkhel pakhat a awm a, season hmasaa table mawng lam luahtu Punjab FC chuan champion lai Mumbai City chu 3-0 in an sawp.

Punjab tan Ezequiel Vidal, Luka Majcen (penalty) leh Mushaga Bakenga ten goal khat ṭheuh an khung a, Mumbai Football Arena-ah mikhual tlangnel zia an chhuah - Mumbai-in a chhanletna tur an nei lo a, an tlawm chiang hle.

Mumbai tan captain Lallianzuala Chhangte leh Hmingthanmawia Ralte (Valpuia) ten inkhel bul an ṭan a, Lza'n goal khungna remchang nei mah se a chhawr lo.

ISL champion lai Mumbai-in tun season-ah beisei an phak lo - league match riat an khelh aṭangin point 10 chauh an la nei a, team 13 inelna league-ah 10-na dinhmun an luah mek.

Punjab hian league match hmasa pathumah hnehna changin, season bul an ṭan ṭha hle. Mahse, an match hnuhnung paliah vawi khat chiah an chak a, an nguai hman - tunah Mumbai hnehin an insiamṭha a, table-ah palina dinhmun an luah ve leh ta.