A zawna vawi li chak Inter Milan

Inter Milan-in Champions League-ah a zawna a vawi li nan hnehna an chang a, RB Leipzig chu 1-0 in an hneh - Leipzig defender Castello Lukeba chuan Federico Dimarco-a freekick aṭanga ball kal chu an lamah a tilut palh a, inkhela goal awmchhun a ni zui.

Serie A club vanneih zan ni se goal khung belh thei tur an ni a, mahse, captain Lautaro Martinez, Denzel Dumfries, Hakan Calhanoglu leh Marcus Thuram te vanneih zan a ni lo a, 1-0 erawhin an chak ta tho.

Inter hian an match hmasa berah Manchester City (0-0) chelhin, a hnuah Red Star Belgrade (4-0), Young Boys (1-0), Arsenal (1-0) leh RB Leipzig (1-0) an hneh a, playoff khel loa last 16 lut turin an dinhmun a ṭha ta hle. Hetihlai hian Leipzig erawh match nga an khelhah an la tlawm vek a, last 16 beisei turin thilmak a thlen a ngai tawh.