Inter Village Football : Team hming aṭanga teh theih a ni lo

G.I.G Motors MFA All Mizoram Inter Village Football Championship 2024-ah hian tun hma lama veng leh khua che ṭha ṭhin aṭanga team che ṭha tur teh chuan, an teh sual fo ang. Vawiin inkhel tur pahnih pawh hi an hming aṭanga teh a rem lo - team ṭha vek an ni.

Chawhma dar 11:00 hian Tuithiang leh Sihphir Venghlun an inkhel ang a, chawhnu dar 1:00-ah Tlangnuam leh Tlangmawi te an inkhel dawn. Sihphir Venghlun hi LPS Cup 2024 champion an ni a, Tlangnuam hi CYMA Football 2023 finalist an ni. Mahse, tun hnaia record nei ṭha pahnih hi chak chiang saa dah an rem bik lo.

In cho tawk

Sihphir Venghlunin LPS Cup an champion bakah MPL11 semifinal an lut a, Saron Veng hian ADFA hnuaiah Second Division club an nei thung. Tun hnai an record thlir chuan Sihphir Venghlun hi team ṭha zawka ngaih ni mah se MPL11 buainaah an player an tel nual avangin an ṭhat tur angin an ṭha thei dawn lo.

Tuithiang hi Zomuana Zahauin an enkawl a, Aizawl FC midfielder hlui Hmangaihkima bakah striker tawnhriat nei ṭha Lalsangbera te an neih avangin team uap lumtu an nei ṭha hle.

Goalkeeper-ah MPL-a Kanan FC kaipuitu Zosangliana an nei a, AFC Academy captain C. Lallawmawma (C. Mama) leh midfielder Isak Lalvenhima te an kawl.

Midfield-ah hian Mohun Academy reserve Lalzuitluanga a awm bawk a, midfielder an neih ṭhat avangin coach tan player rem pawh a nuam ang. Coach Zomuana chuan, "Kan khingpui tur hi an ṭha a, chutihrualin ka naute theihna ka hria a, ka inringtawk khawp mai," tiin Vanglaini a hrilh.

Sihphir Venghlun hian First Division best player Joseph Lalṭhafela kawl bawk mah se Mizoram pum huap anga langsar vut player an nei hran lo a, position tinah player pangngai tak an nei thung.

Goalkeeper Lalrinmawia'n MPL-ah tawnhriat a nei a, tlarhnungah Police defender pahnih Lalrodawngkima leh Lalmuanfela (Mamuana) te an awm. Midfield-ah Joseph-a kawppui turin LPS Cup champion ṭuma captain Joseph Lalrinawma leh AFC Academy midfielder Lalrinhlua te an awm.

Mual sir aṭanga nawr turin Lalrintluanga (Tutu-a) leh Lalfamkima (FK-a) te an nei a, winger tawnhriat nei ṭha ve ve an ni. Tlarhmaa PC Lalruatsanga u PC Lalruatfela a awm ang. Coach K. Lalruattluanga chuan, "Theihtawpin kan inbuatsaih a, result ṭha tak neih theih kan inring tlat a ni," tiin Vanglaini a hrilh.

Hei le, Tlangmawi

Tlangnuam hian Mizoram mipuiin barakhaihin CYMA Football 2023 final an lut a, tun ṭum inelnaah pawh an ṭha chhunzawm. Mahse, an khingpui tur Tlangmawi hi fiahna a tling.

Tlangmawi hi in 50 chuang vel chauh awmna khua ni mah se Mizoram football-ah an mikhual tawh lo. MPL11 emerging player leh I Day Football 2024 best player Michael Lalbiaksanga an kawl a, Santosh Trophy hnuhnung berah Tlangmawi khaw chhuak pahnih an awm.

Defender Laltluangliana erawh an chhungkuaa Republic Venga an awm tawh avangin Tlangmawi tan a khel lo. Mahse, Tlangmawi player-te hi Aizawlah an mikhual lo. 1st Bn MAP Academy-a inzir Lalrohlua, Lalhruaitluanga, Samuel Lalruatbika leh Phillip Lalchhantluanga te an nei a, Aizawl FC Academy defender RH Laltlanhlua (Vala) pawh a la awm.

FC Bethlehem-a right back Lalrochama pawh Tlangmawi tlangval tho a ni a, an khaw tlang dun vela goalkeeper ṭha Lalrinliana an nei a, ani hi Khawhai Zone-ah chuan best goalkeeper chauh ni loin best player-a thlan pawh a ni.

Tlangnuam coach Francis Lalpekhlua chuan, "Tlangmawi ai hian kan ṭhat bikna a awm lo a, kan fimkhur hle a ngai ang. A vannei zawk zawk kan chak ang," tiin Vanglaini a hrilh a, a ṭawng fimkhur hle.

Mahse, Tlangnuam hian inkhelh thiam veng Ramhlun South chu 6-1 zetin an sawp. Santosh Trophy 2023-24 a Mizoram semifnal thlenpuitu zinga mi Vincent Lalduhawma an kawl a, ani hian Ramhlun South lakah hattrick a siam.

MPL-a midfielder hmuhnawm ni pha Kiran Chhetri chu game siamtu a ni a, goalkeeper-ah SYS FC tana goal vengtu rinawm Joseph Laltluangpuia an nei a, tlarhma lamah Laldinpuia leh M. Lalpektluanga te an awm bawk. CYMA Football nomawi an chawi loh hnuin Tlangnuamin Inter Village Football-ah champion an tum ang.