I hriat ṭhin City kha an awm ta lo!

Manchester City an chak zo lo leh ta - Thawhlehni zan khan Champions League-ah City hian Feyenoord an mikhual a, 3-0 ngawta hma an hruai hnuah Pep-a enkawl team hi an tawlhthlu a, Dutch club hi an si phurh an sut zawhtir vek!

City tan Erling Haaland chuan goal hnih khungin, Ilkay Gundogan chuan goal khat a khung bawk a, heng zawng zawng hi minute 60 hmaa thil thleng vek a ni a, English club hi nuamsain an chak dawn niin a lang hman.

Mahse, tun hnaia kan hmuh fo, City tlarhnung talbuai hmuhtir kan ni a, goal thum an chhuah! Dutch club tan Anis Hadj Moussa, Santiago Gimenez leh David Hancko ten goal khat ṭheuh an khung a, si phurh an sut zo.

Hun tawp thlengin goal dang a lut tawh lo a, point thum hlawh chhuak mai tura ngaih City-in point khat an hlawh hram - inelna hrang hranga an match hnuhnung parukah a zawnin an chak zo lo ta a, Pathianni zanah Liverpool an lenchilh zui dawn!

A tirah City

Pep Guardiola-a'n season tawp rualin City-ah contract a hmang zo tawh dawn a, kar hmasa lawk khan kum hnih dang cham turin contract a ziak - hetihlai hian inelna hrang hrangah match li a zawnin an tlawm a, City tlakhniam lai tak a ni.

Contract a ziah hian Pep-a'n, "Match li a zawna kan tlawm vanga contract ziak ka ni mai thei," tiin a sawi a, an chet chhiatna aṭanga thawh leh ngei an tum thu a sawina a ni a, a hun tawp lam chhe taka hman duh loin contract thar a ziak niin a ngaih theih bawk.

Mahse, contract thar a ziah hnua a match hmasa berah Tottenham Hotspur-in an khelmualah ngei 4-0 ngawtin an sawp a, Pep-a contract thar pawhin a fuih harh zo lo niin a ngaih theih - Dutch club Feyenoord an mikhual zui a, fans tam takin an thawh ngei tawh rinna a lian hle.

Beisei ang ngeiin goal pawh an khung hmasa a, Erling Haaland-a'n penalty a hlawh chhuak a, Norwegian striker hian minute 44-naah goal-ah a chantir. City-in 1-0 in chawlhlawk an hmang a, chak ngei an beisei.

Goal a sur

City an phur chhunzawm - second half ṭan aṭanga minute ngana lekah City-in goal an khung chhunzawm zui a, Barcelona aṭanga City-a kir Gundogan chuan corner aṭanga ball kal tauh chhuah chu chiang zetin goal-ah a chantir.

Minute thum a liam a, City bawk kan hmu nawn. Matheus Nunes-a'n mual sir aṭanga chak taka ball tlan luhpuiin, Haaland tan a siamsak a, Norwegian striker hian City goal thumna ni turin a tlawh lut.

Inkhel entu tam tak an mu zui a, City chu an chak chiang ngei dawn nia a lan vang a ni. Mahse, mikhual Feyenoord-in ngaihdan dang an nei a, tlawm an tum lo. Minute 74-naah Josko Gvardiol a chesual a, hei hi Moussa chuan remchangah lain, si phurh sut ṭhen nan a hmang.

A la tawp mai lo cheu. Minute 82-naah Ederson a chesual a, Jordan Lotomba shot chu post leh a ke karah a kaltir - hei hi Gimenez chuan a lo dang lut! Hun a tlem tawh a, City hi an ṭan tluan mai rin a nih laiin Hancko chuan minute 89-naah a khung ve leh a, 3-3 in inkhel a tawp daih!

Ka hre lo!

Inkhelh zawhah Pep-a'n media a hmachhawn a, a hmai a rang nuaih - a inhampilhna a ni a, inkhel en laiin a ṭang hle tih a lang a, a lawm lo hle tih a lang tel bawk! Pep chuan, "Kan tlawm leh ta a, kan rilru puthmang vang a ni em, ka hre lo," a ti a, an chak theih loh chhanah a chhanna a la nei thei bik lo.

Pep chuan sawi zawmin, "3-0 a nih lai kha chuan zia tak a ni. Mahse, kan ngheh tawk loh avangin kan sut zawhtir leh vek. Goal hmasa ber kan 'khilai' a, kan pek belh leh a, a harsa zo ta vek mai a ni," a ti a, an thiam loh vanga chak lo an nih thu a sawi.

Spanish coach chuan, "Thil thlen dan chu kan hmu vek - game ṭha tak kan khel a, hetiang level-ah chuan tawlhthluk a thiang lo," a ti - October 26-a 1-0 a Southampton an hneh hnuah khan City hian goal chhuah loh an nei leh tawh lo.

Hetih chhung hian League Cup round of 16-ah Tottenham chu 2-1 a ngam loin an tla a, league-ah Bournemouth (2-1), Brighton & Hove Albion (2-1) leh Spurs (4-0) an ngam lo a, Champions League-ah Sporting Lisbon (4-1) ngam loin, tunah Feyenoord an draw leh ta.

A harsa dawn

City hian Champions League match nga an khelh tawh aṭangin point riat chiah an hmu a, vawi hnih chakin, vawi hnih draw an nei a, vawi khat an tlawm - team 36 inelnaah 15-na an ni mek a, last 16 lut turin kawng a harsa sawt.

English champion hian match thum khelh tur an la nei a, an hmachhawn turte hi Juventus, Paris Saint-Germain leh Club Brugge niin, mahni muala an hmachhawn tur awmchhun chu Club Brugge chiah a ni tawh.

Round of 16 hi automatic-a lut turin, top 8 chinah tal an awm a ngai a, top 9-24 inkara awm tan playoff khelh a ngai dawn - a tawi zawnga sawi chuan City tan hmabak match thumah chak a ngai a, Juve leh PSG an awm miau avangin a harsa tawh ang.

Pep chuan, "Top eight ni turin hmabak match thumah chak vek a ngai tih ka hria a, mahse, hemi atan hian ngaihtuahna ka seng hman lo. Tuna pawimawh ber chu kan insiamṭhat a, kan inkhelh leh tur atana inpuahchah a ni - zanina kan game angah kan chak thei lo a nih chuan a dangah phei chuan a harsa dawn," a ti a, Liverpool-in an lo hmuak e!