Beisei aia khel ṭha Atalanta

Europa League champion Atalanta-in Champions League-ah a tikimtu mai nih an tum lo tih an pholan chhunzawm zel a, Thawhlehni zan khan Swiss club Young Boys chu khualmualah 6-1 ngawtin an sawp.

Atalanta tan Mateo Retegui chuan minute kuana lekah goal hmahruai khungin, Young Boys hian minute hnih hnu lawkah Silvere Ganvoula hmangin an chhanglet - mahse, ngam loh chala chil hnawm ang lek a ni.

Italian club Atalanta hian goal nga dang an khung leh a, an chak chiang hle - Retegui-a'n goal khat dang a khung belh a, Charles de Ketelaere chuan goal hnih khungin, Sead Kolasinac leh Lazar Samardzic ten goal khat ve ve an khung ve leh bawk.

Belgian attacking midfielder Charles De Ketelaere tan zan duhawm bik a ni - goal hnih a khung bakah assist vawi thum a nei tel a, kum 23 mi lek De Ketelaere hi Belgium tan pawh player ṭangkai la ni thei tur a ni.

Atalanta hian Champions League-ah match nga khelin point 11 ngawt an nei ta a, tlawm an la nei lo. Serie A-a hmahruaitu Napoli pawh point khat chauha la phak lo team hian Arsenal (0-0) leh Celtic (0-0) an draw tih loh chu, match thum dangah an chak vek - last 16 luh an beisei ang.