Goal ruk khungtu Atletico chak

Atletico Madrid chu match hnih an chak loh hnuah Champions League match hnih a zawnin an chak ve leh ta a, last 16 luh beiseina a nung thar - Spanish club hian Thawhlehni zan khan khualmualah Sparta Prague chu 6-0 ngawtin an sawp!

Pound maktaduai 81 man striker Julian Alvarez chuan a man to chhan pholangin goal hnih a khung a, Angel Correa chuan goal hnih khung bawkin, Marcos Llorente leh Antoine Griezmann ten goal khat ve ve an thawh ve bawk.

French forward Griezmann tan zan chhinchhiah tlak bik a ni. Champions League-a match 100 a khelhna chiah a ni a, goal nen a hun duhawm hi a lawm - European football-a club inelna sang berah hian goal 38 a khungna chiah a ni nghal.

Atletico Madrid hian Champions League-ah 2-1 a RB Leipzig hnehin season bul ṭan mah se, October-ah Benfica (4-0) leh Lille (3-1) te chu rin loh takin an ngam lo a, Diego Simeone leh a naute tihmualphoin an awm.

Mahse, November-a match hnih an khelhah insiamṭha zuiin, Paris Saint-Germain (2-1) leh Sparta Prage (6-0) an hneh leh ta a, last 16 khel turin beiseina thar an nei ve leh ta - hmabakah Slovan Bratislava (home), Bayer Leverkusen (home) leh Red Bull Salzburg (away) an hmachhawn dawn a, a harsa tawh lo ang.