Europe-ah Amorim enkawl United

Manchester united manager thar Ruben Amorim-a'n a team enkawlin a duh anga khel chhuak tur chuan hun an mamawh tih a sawi tawh a, zanina Bodo/Glimt nen an inkhelh hunah pawh a duh dan aiin a player neih dan mila an khelh a la ngai a nih pawhin a mak lo ang.

Amorim hoa an match hmasa berah Man United hi Ipswich nen 1-1 in an inhnehtawk, ball inpek sual an ngahin tlarhma an hriam tawk lo a, a hnung lam an nghing nasa hle bawk - zanin an inkhelhna tur hi Old Trafford a ni a, a hma aiin an zia hret chuan a rinawm.

Mason Mount leh Luke Shaw te an dam tawh a, zaninah bul an ṭan theih a rinawm. England international defender Shaw hi Amorim-a duh anga khel thei tur niin a lang, goal nawr leh a ven kawngah a ṭangkai ṭhin avangin a lakah beisei an nei sang dawn.

Nipui laia lakluh Leny Yoro pawhin team training a zawm tawh a, a tir aṭanga a khel lo a nih pawhin khelmualah a vawi khat nan a luh a rinawm - Harry Maguire erawh a hliam a la dam lo, a inlan thei dawn lo thung a ni.

Sweden leh Argentina international Victor Lindelof leh Lisandro Martinez te an la chawl bawk a, tlarhnung laia khel tur hi Amorim tana buaina lian tak pakhat chu a ni, kum 36 mi Jonny Evans chuan a ho khawm leh a ngaiin a rinawm.

Man United hian kar tawpah Premier League match khel turin Everton an mikhual zui leh nghal dawn, chumi dawta an tum tur chu Arsenal a ni. Gunners an hmachhawn tur inbuatsaih nan match pahnih an la nei anga sawi theih a nihna lai a awm, an hun neih chhawr ṭangkai an tum ngei ang.

Zanin inkhel tur dangah chuan Tottenham leh AS Roma inhmachhawn turin ngaihven a hlawh ang. Spurs hi Manchester City sawp thei an ni a, an mikhual tur Roma hi Claudio Ranieri enkawl an ni thung.

Roma hian season an hman ṭhat loh vangin danglam an tum a, coach tawnhriat nei tam Ranieri an la lut - Italian manager hi Leicester City a enkawl laia EPL champion tawh a ni a, chuvangin Spurs hi a hrechiang dawn - inkhel hmuhnawm a ni ngei ang.