Zemabawk N, Ramhlun N leh Chanmari W te an chak

G.I.G Motors MFA All Mizoram Inter Village Football Championship 2024-ah Chanmari tan hmun a awm ta lo, nimin khan Ramhlun North-in an hneh. Inkhel dangah Zemabawk leh Chanmari West ten Farkawn leh Electric Veng te an hneh ve bawk.

Zemabawk North hian last 16-ah team ṭha Bawngkawn an hmachhawn ang a, Ramhlun North leh Chanmari West te an inkhel bawk ang. Team pali hi group khata mi vek an ni a, semifinal-ah team khat tan chauh hmunruak a awm.

Goal ṭha 2

Zemabawk North-in Farkawn lakah bul an ṭan ṭha a, inkhelh ṭan tirh minute 25 chhunga goal hnih an khung hma rah an seng. Minute 22-naah Fredy Lalrinchhana'n mual dinglamah ball a chang a, a hmaah Mizoram defender Lalhmangaihsanga a la awm chungin hlauhthawnna nei miah loin a khalh lut a, vawi khat a step over hnuah kawh zetin a pet lut.

Farkawn tlarhnung an buai chhunzawm a, box chhunga ball an clear chhuah theih lawk loh an tuar. Minute 25-naah Lalnunsanga'n ball per chang fuhin kawh zetin a pet lut a, Zemabawk North dinhmun a ṭhat phah hle.

Goal mamawh Farkawnin second half-ah nawr hret mah se an inngahna Tea Chinzah-in goal a khung thei lo. Zemabawk North lamah game pawt muang turin midfielder tawnhriat nei ṭha David Lalrinmuana te an awm a, harsatna hranpa nei loin hnehna an chang.

Mamatea Show

Chanmari leh Ramhlun North inkhel beisei ang ngeiin a hmuhnawm a, Mizoram junior team midfielder Lalremtluanga'n (Mamatea) hming chher nan a hmang. Inkhel hmuhnawm bikah Mamatea goal ropui pahnih hmangin Ramhlun North 3-2 in an chak.

Chanmari hian tlarhma nei ṭha mah se tlarhnung lam an ṭha tawk lo a, minute 27-naah rinrawl ber Lalrinchhana Tochhawngin cross ball satliah a dah ṭhelh. Rodinmawia'n a hun ṭha a bawhpelh lo a, goal hmahruai a khung.

Chanmariin an nawr zui a, mahse Ramhlun North vuaklet an dawl lo. Minute 41-naah Mamatea'n halfway line aṭanga yard 10 pelh hret aṭanga pet nghal thutin Chanmari goalkeeper MS Dawnglaina a rep nalh hle.

Minute 59-naah Mamatea bawk a rawn inlar a, Chanmari tihsual aṭanga a ball hmuh chu defender bum nan hmangin box pawn aṭangin goal kilah a pet - goalkeeper MS-a a che lo.

Ramhlun North-in 3-0 a hma an hruai tak avangin an dinhmun a ṭha a, mahse Chanmari ṭhatna a rawn lang ṭan chiah. Moses Lalrinzuala'n minute 63-naah freekick aṭangin a khung a, minute 80-naah Moses bawk hian ṭha zeta lalutin goal ṭha bik a khung ve bawk.

Chanmari goal bawh a na a, chutihrualin Ramhlun North substitute Rohmingthanga'n chance ṭha bik ṭum hnih a hlah. Hun tawp dawn thlengin inkhel boruak a sang a, Khawpuimawia'n box chhung aṭanga a bicycle kick chu a lut teuh viau bawk. Ramhlun North an ṭang tluan a, 3-2 in an chak.

West hun a thleng

Zemabawk North leh Ramhlun North an chak hnuah Chanmari West hun a thleng a, Electric Veng nen 3-3 a inhnehtawk hnuin penatly shootout-ah 5-3 in an hneh. Coach H. Lalnunzira enkawl Chanmari West-in bul an ṭan ṭha a, second 18-na lekah A. Lalhruaitluanga hmangin a pet goal nghal.

Nimin tlai inkhel a nung ṭha a, C. Malsawmtluanga goal hnih hmangin Electric Vengin 2-1 in an lehthal. Minute 20-naah vei lam aṭanga cross ball chu Sawmtluanga'n a ke vei lamin vawi khatah petin goal kilah a lut a, minute 28-naah hmahruaina goal a khung leh bawk.

Chanmari West tan midfield khaipa Lalengmawia a rawn inlar a, minute 32-naah box pawn aṭangin a ke vei lamin goal kilah a ṭha zetin a pet lut. Minute 50-naah Chanmari West-in hma an hruai leh a, chak inbeisei hman mah se hun tawp hma chiahin Electric Vengin Lalthlanpuia Renthlei hmangin siphurh an sut.

Penalty an pet zui nghal a, Electric Veng tan captain Lalbiakhlua'n a hlah laiin Chanmari West-in an pet goal vek a, coach Zirtea hote penalty shootout-ah 5-3 in an vannei ta zawk.