Boxer pasarihin semifinal an lut leh ta

Zudio LPS Pro Fight 2024 chu a hmawr bawk hun a hnai chho zel a, boruak a sangin inelna a hmuhnawm thei ta hle. Thawhlehni zan khan quarterfinal match pasarih khelh niin, nizan khan semifinal lut tur chin chu chinfel a ni.

Ruahman dan chuan November 29-30 ah te hian semifinal khelh a ni ang a, chumi hnuah title fight tur zawnna neih leh a ni ang. December 6, Zirtawpniah title fight neih a ni dawn, semifinal aṭang chuan a hmuna en man Rs 100 a ni tawh ang.

Middleweight: Zoremsiama hi rount khatnaah bet zawk mah se, round hnuhnung pahnihah a khingpui HC Zorinkhuma vawi thum a hnek tlu a, round thumna tawp nan second 27 a la awm tihin Zorina a knockout a, a vawi khat nan Pro Fight semifinal a lut.

Welterweight: Mixed Martial Arts fighter Lalnunsanga'n harsa takin seeded boxer Ruatfela Zote a hneh a, split decision-a a chak rualin semifinal a inhlangkai. Chawnpui rawlthar hian boxing inelnaa a hmachhawn hmasa berah boruak a ngam viau a, final lut turin theihna a nei.

Bantamweight: Lalruatdika'n a khingpui Lalnunpuia lakah harsatna lian tham a tawk lo. Judge point pekah pakhatin round khat lehlam a pe lo tih loh chu a chungnung zawk vek a ni. Kum 19 mi ve ve an ni a, inhnek a hmuhnawmin hmabak an nei eng tih a lang bawk.

Bantamweight: Round thumnaah tla fual deuh mah se seeded boxer Eric Lalthangkima'n inhnek thununin inthlau takin a chak a, Thekte boxer Vanhmunliana chet chhiat belh chhahin round hnuhnung berah lehlam a kuah nasat avangin a point paihsak a ni.

Flyweight: Nikum quarterfinal-a chak lo C. Lalchhanhima'n semifinal a lut ta. Mamit boxer hi judge pahnihin 29-28-a an chaktir laiin pakhatin 29-28 thoin a khingpui Lalhruaitluanga Kawlni a chaktir thung a, mahse a tlang ta tho a ni.

Lightweight: Kum 17 mi chauh la ni mah se Lalkhawngaiha a tal na thei hle - Venghlui rawlthar hian a tir aṭangin a hnek chhuak hnem a, a tawp thlengin thawnthu a danglam lo - a khingpui Zonunzira lakah harsatna nei loin a chak.

Lightweight: Vanlalnghaka'n Abednego VL Dinpuia lakah boxer ṭha a nihna a lantir a, tun inelna neih laiah GIG Motors Fighter of the Night atana thlan nawn hmasa ber a ni hial, a hneh tak Dinpuia hi 2024 North East Olympics-a bronze medal latu a ni.