Futsal League club enkawl turin AFC Level 1 coach

Mizoram Football Association chuan MFA Futsal League-ah AFC Futsal Level 1 Coaching Course kal ngei enkawl turin thutlukna a siam.

MFA chuan, "AIFF lam thurawn angin, State FA Top Futsal Competition-ah, club tinin head coach/coach atan ‘AFC Futsal Level 1 Coaching Course’ kal ngei an nei tur a ni tih a ni a. 2024-25 MFA Futsal League-ah pawh hman nghal tur a ni ang," tiin November 26, Thawhlehni khan thuchhuah an siam.

AIFF leh MFA chuan December 9-14, 2024 chhung hian 'AFC Futsal Level 1 Coaching Course' chu R. Dengṭhuama Indoor Stadium, Mualpuiah a buatsaih dawn a, MFA FL 2024-25 khel tur club tin te, he course-ah hian Club aiawh tel tir tum theuh turin a inhriattir.

MFA Futsal League 2024-25 ah hian ‘AFC Futsal Level 1 Course’ kal lo, head coach/coach atana hmang an awm chuan, hremna a awm dawn. Match khatnaah Rs 2,000 an chawi ang a, match dang zelah a let zelin an pawisa chawi hi a pung dawn.

Division I club tan pawh AFC Futsal Level 1 Coaching Course-a tel hi a dil theih a, course fee hi Rs 22,300 (AIFF - Rs 11,800 leh MFA - Rs 10,500) a ni ang.