Goal 100 khung thei Lewandowski

Robert Lewandowski chu Champions League-a goal 100 khung tling thei pathumna a ni ta - Thawhlehni zan khan Champions League-ah Barcelona chuan 3-0 in Brest an hneh a, Lewy hian goal hnih khungin, Dani Olmo chuan goal khat a thawh bawk.

Kum 36 mi Lewy hian minute 10-na aṭangin goal a khung ṭan a, Brest goalkeeper Marco Bizot laka a penalty hlawhchhuah chu amah vekin goal-ah a chantir - hei hi Champions League-a a goal 100-na a ni a, European football-a club inelna sang bera heti zat goal khung thei pathumna a ni.

Lewy hma hian Cristiano Ronaldo (140 goals) leh Lionel Messi (129) te chuan Champions League-ah goal 100 an lo khung tling tawh a, player ropui bik pahnih zingah Polish striker hian a hming a ziak kai ve ta.

Hun pek belh minute hnihnaah Lewy hian a goal hnihna a khung leh bawk a, Champions League-ah goal 101 a khung tawh tihna a ni - Lewandowski goal khung karah Dani Olmo chuan goal khat a thawh ve bawk a, Barca tana Champions League-a a goal hmasa ber a ni.

Barca boss Hansi Flick chuan, "Statistic lam hi ka buaipui vak lo. Mahse, Messi leh Ronaldo dawta goal khung tam pathumna nih a, an kianga ṭhut ve chu ropui tak a ni. Munich aṭangin Lewy nen hian kan inhre tawh a, khatah pawh khan record tam tak a siam tawh.

"Barca-ah pawh goal a khung chhunzawm zel a, hei hi kan team tan a ṭangkai hle," a ti - Lewy hian tun season inelna hrang hrangah match 19 khelin goal 22 a khung tawh a, assist vawi hnih a nei bawk.

Champions League-a goal 101 khung tur hian match 125 a mamawh a, Barca bakah Borussia Dortmund leh Bayern Munich tan UCL hi a khel. Ronaldo-a'n goal 140 khung turin match 183 a mamawh a, Messi-a'n goal 129 khung turin match 163 a mamawh thung.

Barcelona hian Champions League match nga khelh tawhah vawi li hnehna changin, vawi khat an tlawm a, match thum khelh tur la neiin, Borussia Dortmund, Benfica leh Atalanta an la hmachhawn dawn.