Tennis tournament upa leh ngaihhlut hlawh Wimbledon chuan hmeichhe champion thar a nei, a hming chu Barbora Krejcikova a ni a, a beisei phak loh ramah a cheng ta a ni.

Inrinni zan final hmuhnawm takah kum 28 mi Krejcikova hian a khingpui Jasmine Paolini chu 6-2, 2-6, 6-4 in a hneh. French Open 2021 champion hian nomawi chawi turin championship point vawi thumna a chhawr ṭangkai ta chiah a ni.

Season hmasa khan Marketa Vondrousova chuan Wimbledon hmeichhe singles title hi a lo la tawh, tunah Krejcikova a champion leh tak avangin Czech Republic nula pahnihte a kum zawnin an champion ta chiah.

Thawnthu ngaihnawm

Barbora Krejcikova tan tun season kal lai hi a harsa hle, kum chanve hma lamah khan match a khelh zawng zawng aṭangin vawi ruk chiah chak ni hmel a hmu, a dangah chuan a tlawm fai vek.

Mahse, grass court season an hmang ṭan a, beisei loh tak maiin thil a danglam - Wimbledon champion ni tur chauh pawh hian a zawnin match sarih chhung hnehna a chang thei leh tlat si a ni.

Wimbledon 2024 a match hmasa berah Veronika Kudermetova nen set thum an khel nghal a, darkar thum hun a hmang tling hial, a hnuah rinkai lo zawk ni zel chungin Danielle Collins, Jelena Ostapenko leh Elena Rybakina te a hneh.

Tun hmain French Open champion a lo ni zauh tawh a, hmeichhe tennis player inkhel lai mek zingah Venus Williams (7), Iga Swiatek (5), Naomi Osaka (4) leh Angelique Kerber (3) te hnung zuiin, major title pakhat aia tam kawl thei zingah a tel ta chiah a ni.

Duhthusam chu

Mitin hian duhthusam kan nei ṭhin - Krejcikova pawh hian a naupan lai aṭangin duhthusam leh hlenchhuah chak a nei ṭhin a, chung zingah chuan French Open champion a tel, kum 12 mi a nih laiin a note buah a duhthusam hi a ziak.

French Open champion a tihlawhtling tawh a, a tleirawl chhuah hlima a châk chu Wimbledon champion a ni leh bawk. Krejcikova chuan, "Ka naupan lai chuan French Open champion nih kha ka châk ber ṭhin a, a thleng tawh bawk.

"A hnu lamah khan Wimbledon ropuizia leh grass court tournament hlutna hi min hrilhtu an awm fo a, a taka han khelh ve chiah chuan a ropuina pawh a lo sang takzet a, khawvela tennis tournament lian ber ni maiah ka ngai tawh.

"Mi tam takin champion a harsa an tihna hmun a ni a, chumi hmunah ngei mai chuan hlawhtlinna ka chang ta si, ka lawmna hi tunah chuan thuin a sawifiah phak lo," tiin a sawi.

Novotna tan a hlan

Kum 18 mi a nih laiin Krejcikova-i nu leh pa te chuan an fanu hi Jana Novotna hnenah an hruai, ani hi Wimbledon 1998 champion a ni a, an fanuin tennis khelh dan phunga hma a sawn zel theih nan a puihna an dil.

Novotna hian a lo pui ngei a, coach leh mentor atan a hmang kawp. Ani kaihhruaina hnuaiah hian nasa takin hma a sawn a, grass court inelna lian danglamna leh a hlutna pawh a rilruah a tuhsak, kum 2017 khan cancer vangin Novotna hi a thi.

Krejcikova chuan, "Jana Novotna kan hmuh hmasak ber ni aṭang khan ka nun a inthlak danglam, ka theihna hrang hrang kha keimah aiin a hrechiang zawk a, hma ka sawn theihna tur lai kha min hrilh chat chat thei bawk.

"A boral hma khan Grand Slam champion ka nih theih thu min hrilh a, a sawi ang ngeiin Paris lama ka hlawhtlin hnuah London lamah ka chhunzawm, hengte hi amah vanga ka chan theih an ni," tiina coach boral ta chungchang a sawi.

Pahnihna Paolini

Champion ta chiah lo mah se tun hnaia Jasmine Paolini hmasawnna leh a sulhnute hi sawi nep theih a ni lo, thla 12 chhung lekin hmeichhe tennis huangah danglamna nasa tak a rawn thlen a ni.

Kum 28 mi a ni a, tun hma lamin sulhnu ropui leh chhuan tur tak a nei hran lo. Mahse, kumin February thla khan Dubai-ah WTA Tour title a la a, khawvel barakhaih turin hmanni lawk khan French Open final a lut bawk.

Clay court leh grass court inelna lianah a zawnin final a lut a, champion ta chiah lo mah se nomawi a hnaih thei hle. Italian nula, 5ft 4in a sang Paolini chuan, "Tun hnai thla hnih chhunga ka tennis khelh dan chu a lawmawm hle.

"Wimbledon final meuh ka khel ta a ni a, champion lo mah ila lawm tur ka ni. Chutihrualin, inelna kan hmachhawn a nih chuan chak tumin kan bei tur a ni a, tun aia ṭha zawka inlan leh hi ka tum tur a ni ang," a ti.

Mipa Final

Wimbledon mipa singles champion thar an awm dawn lo, nizan khan vawi sarih champion tawh Novak Djokovic leh champion lai Carlos Alcaraz ten final an khel a, result kan hre hman lo.

Alcaraz hian semifinal-ah Daniil Medvedev chu 6-7 (1-7), 6-3, 6-4, 6-4 in a hneh a, inkhel dangah Djokovic chuan Lorenzo Musetti chu 6-4, 7-6 (7-2), 6-4 in a lo hneh ve bawk a ni.

Medvedev leh Musetti te hian a vawi khat nana Wimbledon champion nih an beiseina a thamral a, nomawi nei tawh sa Alcaraz emaw Djokovic emawin an neih leh leh ta zawk dawn a ni.