Goal ruk khung thei Aizawl FC an ṭha

LZ Juice MPL11-ah Aizawl FC chuan chak hmel an hmu ta a, team thar Sihphir Venghlun chu 6-1 in an sawp. FIFA-in a hrem avangin I League club hian player lak tharte la chhawr thei lo mah se Sihphir Venghlun lakah harsatna an tawk lo a, Augustine Lalrochana'n hattrick a siam.

MPL11 round hnih khelh zawh a ni tawh a, tuna a lan dan chuan goal a lut tam dawn. Inrinni chawhnua RG Stadium-a inkhelah hian goal sarih ngawt a lut. Victor Lalbiakmawia hoten match hmasa berah Chawnpui lakah point khat chauh hlawh chhuak mah se Sihphir Venghlun lakah erawh point thum hlawh chhuakin goal ruk an khung bawk.

Coach Victor-a'n finishing an ngaih pawimawh thu a sawi a, training-naah pawh an tih tam thu, inkhelh hmain an sawi. Training kal hmang an thlak hretin rah ṭha a thlen a, minute 15-na lekah Augustine hmangin goal hmahruai an khung a, ball petu Lalmuanpuia fak hmaih a thiang lo bawk.

Aizawl FC hian winger thar Sawma Tlangte an la chhawr thei lo a, a awm sa Augustine leh BD-a ten dinhmun sawhngheh hman an tum tih a lang. Champhai Zotlang tlangval Lalbiakdika Fanaiin C. Hriata siam chu minute thum hnuah a khung leh nghal.

I League club dinhmun ti ṭha lehzual turin Augustine-a'n minute 42-naah Sihphir Venghlun defender Zohminga tihsual a hrem a, first half-ah 3-0 a ni. Second half-ah Sihphir Venghlunin player rawn thlak kualin Lalthanpuia hmangin minute 56-naah si phurh sut ṭhen mah se Aizawl FC tiphurtu chauh a ni.

Minute 70-naah Augustine-a'n hattrick a rawn siam a, tun inelnaa hattrick siam thei pahnihna a ni - round hnihna lekah hattrick siam pahnih an awm der. Minute khat hnu lekah C. Hriata'n a khung a, Aizawl FC striker hian match hnihah goal hnih a khung.

Minute 79-naah Augustine-a'n goal ropui a khung a, a khalh tlang! Goal li khungtu Augustine hi a phu ang ngeiin man of the match-ah thlan a ni a, Aizawl FC 6-1 ngawtin an chak bawk. I League club hian team thar zinga la che ṭha ber Ramhlun Athletic FC nen July 18, Ningani hian an khel leh ang.