Weightlifting-ah Mizo tleirawlte an che ṭha

Asmita Khelo India Youth, Junior leh Senior Women league Zone A chu July 10 - 14, 2024 chhung khan Bhubaneswar, Odisha-ah neih a ni a, Mizoramin youth-ah silver pahnih lain junior-ah gold leh bronze an la a, senior-ah silver pakhat an la bawk.

Mizoram aiawh hian Khelo India State Centre of Excellence (KISCE) SYS Rajiv Gandhi Stadium Hostel-a awm mek aṭangin lifter pali Cindy Lalparmawii (Kolasib Saidan), Zosangzuali (Keiṭum), Zodinsangi (Falkawn) leh B. Lalremruati (Dinthar) te an kal. Coach Malsawma Khiangte (KISCE) leh Malsawmtluangi, Masseuse (KISCE) ten an hruai a ni.

Zosangzuali hi a kum a la naupang a; youth, junior leh senior-ah a tel thei vek a, vawi khat chawi hi inelna pathum tan a rin theih vek bawk. Keiṭum tleirawl hian youth (81 kg)-ah silver medal lain junior (87 kg)-ah gold medal a la a, senior (87 kg)-a silver medal a la bawk.

Kolasib Saidan tleirawl Cindy Lalparmawii hi youth leh junior-ah a lang pha ve ve a, 76 kg category inelnaah youth-ah silver medal lain junior-ah bronze medal a la bawk.

Youth, junior leh senior inelnaah Odisha-ah team champion an ni vek a, inelna thlengtu hi an che ṭha fal hle.