Chanmariin I League 3 an khel dawn
Indian football-in awmze nei zawka league kalpui tumin hmalakna an kalpui zel a, state tin aiawhten inelna ṭha zawk an neih theihna tura ruahman I League 3-ah Chanmari FC an khel dawn.
I League 3 hi season hmasa aṭang khan khelh ṭan niin, Indian football league-ah fourth division a ni a, state league hi fifth division 'level' tihna a ni - season hmasaah Mizoram club inlan an awm lo.
Tun season-ah erawh Mizoram Football Association chuan I League 3 khel turin Chanmari FC a thlang a, Mizoram Premier League club hian Mizo hmel timawi turin he inelna hi an hmachhawn ang.
I League 3?
Indian football-ah chuan I League 3 hi thil thar a ni. He inelnaah champion hi I League 2 khel turin an tling ṭhin. India ramah Indian Super League a sang ber a, I League, I League 2 leh I League 3 ten an dawt.
I League champion-in ISL an khel ṭhin a, a hnuai lam pahnih hi I League 2-ah an tla ṭhin thung. I League 2-a champion leh pahnihna chu I League an inpetkai ve leh thung a, ISL-ah erawh relegation a la awm lo.
I League 3-a champion bakah pahnihna leh pathumna te chu I League 2 khel turin an tling ve leh ṭhin a, season hman zawh takah khan Sporting Clube de Goa chu champion niin, pahnihna Dempo SC leh pathumna Sporting Club Bengaluru te nen I League 2 an inpetkai.
A tel tur
AIFF hnuaia state tinin I League 3 khel turin an state aiawh team pakhat an thawh thei a, state league champion emaw state FA-in an thlanchhuah nih a ngai - tun season-a Mizoram aiawh tur CFC hi Mizoram FA thlan an ni.
Chanmari bakah hian State aiawh thlan team 14 chu AIFF lamin an tichiang tawh a, state aiawha tun season-a thlanchhuah inel tur hi team 14 tihna a ni. Anni bakah hian Maharashtra Oranje FC leh Kenkre FC te chu I League 2 aṭanga tla niin, an inlan ve bawk ang.
Hetihlai hian season hman zawh taka I league 3 playoff khel phak Klasa leh Kerala United FC chu I League 3-ah hian an inlan chhunzawm dawn.
A kalphung tur
Season hmasa khan team 25-in I League 3 an hmachhawn a, group pangaah team panga zel awmin ṭhen hran an ni a, group tina a sang ber ṭheuh chu playoff khel turin an tling.
Playoff-ah hian team panga hi vawi khat ṭheuh inkhel kual lehin, table chung lam luahtu pathum chu I League 2 khel turin an tling a, palina leh pangana te chu State FA-in an thlan kher ngai loin, I League 3-ah an awm chhunzawm.
Tun season-ah hian team 20-in inelna an hmachhawn dawn a, September-ah khelh ṭan tur a ni ang. Season hmasa anga khelh tur a nih chuan hmun pakhatah zel group pakhat inelna kalpui a ni ang.