Al Ittihad coach thar Blanc

Saudi Pro League lamin tun nipuiah pawh thawm an neih nat chhunzawm zel - Saudi club lar Al Ittihad chuan France coach hlui Laurent Blanc chu coach thar atan an la lut a, kum hnih atan contract hi ziakin, kum khat dang pawhsei theih a ni.

Khawthlang media-te tarlan dan chuan French coach hian kum khatah euro maktaduai 10 a hlawh ang a, SPL nomawi a chawipui chuan bonus €8mtd a dawng dawn bawk.

Blanc hi September 2023 khan French club lar Lyon nen inhriatthiam tawnnain an inṭhen a, hetihlai hian Ligue 1 table mawngphah luahin, club enkawl dang nei loin a awm reng - tunah Saudi a pan dawn ta.

Kum 58 mi coach hian Marcelo Gallardo a thlak a, Argentine coach Gallardo hian Al Ittihad hi Asian Champions League khel turin a hruai kai zo lo a, a tawpah ban a nih phah.

Al Ittihad hian player langsar tak tak an kawl nual a, Blanc-a French pui Karim Benzema leh N'Golo Kante bakah Liverpool midfielder hlui Fabinho leh Portuguese forward Jota an kawl bawk.

Blanc hian Bordeaux, France, Paris St-Germain, Qatari club Al-Rayyan leh Lyon a lo enkawl tawh a, Asian football-ah pawh a mikhual hran lo. Bordeaux aṭanga a coaching career zawh ṭanin, 2008-09 season khan kum 10 hnua a vawi khat nan league-ah a champion pui.

Bordeaux-a a hnathawh ṭhat avangin France national team a enkawl zui a, player a nih laia match 97 ngawt a khelhsak team tan danglamna erawh a thlen thei lo. Euro 2012-a quarterfinal a thlenpui chu chhuan tur a neih chhun a ni.

France a chhuahsan hnuah Paris Saint-Germain enkawlin, season thum a zawnin league champion a nihpui a, Ligue 1 manager of the year-ah vawi thum ngawt thlan a ni.

Blanc hian player ang chuan France, Italy, Spain leh England-ah te a khel ṭhin a, Montpellier, Barcelona, Inter Milan leh Manchester United tan pawh a lo khel tawh.

A club zawm thar Al Ittihad hi Saudi Pro League-ah vawi kua champion tawhin, 2022-23 season kha an champion hnuhnun ber a ni a, season hman zawh takah khan pangana an ni phak hram.