Ipswich an bazar chhunzawm zel

Premier League kai thar Ipswich Town-in season khat lek English top flight league luah an tum lo a, an squad an tihchhah chhunzawm zel - Manchester City forward Liam Delap an la lut leh ta a, a man hi pound maktaduai 20 thlenga sang chho thei tur a ni.

Kum 21 mi Delap hian kum nga chhung atan contract a ziak a, Ipswich-in tun transfer-a an player lakluh palina a ni - Delap hi a pa chu Stoke City midfielder ṭhin Rory Delap kha niin, a pa hnung a zui zel.

Ipswich ang thoa Premier League kai thar Southampton pawhin Delap hi an duh a, mahse, player hian Ipswich lam pan a thlang ta zawk. Ipswich hian a man atan £15mtd an pe phawt ang a, a bak £5mtd erawh a khelh ṭhat dan a zira belh leh tur a ni.

Delap hian Manchester City tan league match hnih a khel ve hman a, season hmasa kha Championship club Hull City-ah loan-a khelin, match 32 a inlanah goal riat a khung thei. Stoke-ah loan-in a lo khel tawh bawk.

Ipswich hian Hull City centre-back Jacob Greaves chu an lo la lut tawh bawk a, a man zat tarlan ni lo mah se, kum nga chhung atan contract a ziak. Ipswich hian Delap leh Greaves bakah hian forward Omari Hutchinson (Chelsea) leh defender Ben Johnson (West Ham) te chu tun transfer inhawng mekah hian an lo la lut tawh bawk a, English top flight league khel turin an inbuatsaih nasa hle.