Brighton-in midfielder thar nei

Coach thar nena season thar hmachhawn tur Brighton & Hove Albion chuan central midfielder Malick Yalcouye chu Swedish club IFK Gothenburg aṭangin an la lut a, kum 2029 thleng an hnena khel turin contract an ziahpui.

Kum 18 mi midfielder hi a man zat tarlan ni lo mah se, khawthlang media-te chuan pound maktaduai ruk vel niin an sawi a, Seagulls (Brighton sawina) ah hlawhtlin lehzual a inbeisei ang.

Mali-a piang, Ivory Coast khua leh tui nihna nei bawk Yalcouye hian Ivorian club ASEC Mimosas aṭanga a professional zinkawng zawh ṭanin, nikum khan Gothenburg a zawm ve chauh - Swedish club tan hian match 11 khelin goal khat a khung.

Brighton hian an coach Roberto De Zerbi nen an inṭhen hnuah head coach atan Fabian Hurzeler an la lut a, kum 31 mi lek ni chunga Premier League club coach ni thei Hürzeler hnuaiah player an la lut nual tawh a, Yalcouye hmain Ibrahim Osman, Yankuba Minteh, Mats Wieffer leh Amario Cozier-Duberry te an lo la lut tawh a ni.