Parrott-a'n Spurs chhuahsan

Tottenham Hotspur chuan forward Troy Parrott an hralh a, Dutch club AZ Alkmaar a zawm dawn. A man zat hi tarlan ni chiah lo mah se, euro maktaduai riat bawr vel nia ngaih a ni a, kum nga chhung atan contract a ziak bawk.

Republic of Ireland international Parrott hi Tottenham Hotspur academy aṭanga inzir chhuak niin, kum 17 lek a nihin Premier League-a a match hmasa ber a khel tawh.

Mahse, kum 22 mi forward hian beisei a phak lo zui a, Spurs-a a hun tam zawk chu loan-a club dang tana khelh nan a hmang a, Millwall, Ipswich Town, MK Dons leh Preston North End-ah te loan-in a khel hman.

Season hman zawh tak kha Dutch club Excelsior Rotterdam-ah loan-in a hmang a, inelna hrang hrangah match 32 khela goal sarih khungin, club lian zawk AZ Alkmaar-in a nghetin an la dawn ta a ni.

Parrott chuan, "Ka kal zelna turah AZ zawm hi thutlukna dik niin ka hria a, season hmasa kha Eredivisie-ah hian loan-a hun ka lo hman tawh avangin ka tan thil thar a ni lo," a ti a, Dutch football-ah hming chher theih a beisei.

Spurs tana vawi li inlan ve hman Parrott hian an ram tan match 23 khel tawhin, goal nga a khung tawh.