Mala hmachhawn turin Johnkenty a inpeih

HC Johnkenty Vanhlimpuia chu LPS Fight Night hmachhawn turin a inpeih tawh hle a, a khingpui tur R. Malsawmtluanga lakah hnehna chan ngei a inring - Mizo mipui ten inhnek hmuhnawm kan en thei ngei dawn niin a lang.

July 26, Zirtawpni zan hian LPS Arena, Falkland Park-ah Bosch Home Appliances LPS Fight Night neih tur niin, he hunah hian Johnkenty-a hi 2019 LPS Pro Fight lightheavyweight a lak hnuah Mizorama a inhnek leh hmasak ber tur a ni.

Tuipui boxer Johnkenty chuan, "Mala nen kan vawi khat intawnna tur a ni a, eng nge thleng ang tih ka hrethiam lo. Cho tur dang a hre lo a, min cho ta mai niin ka hria," a ti.

Nikum November thla khan India ram puma sipai inelna Inter Services Championship lightheavyweight-ah Vana a champion a, Indian Navy boxer chhuanvawr niin zing, chhun, tlaiah ngawrh taka a inbuatsaih reng avangin a inringtawk hle.

A khingpui tur Mala hi sipai boxer ve bawk niin Indian Army Sports Institute, Pune-ah a inkulh ve thung a, Mizoramah hneh theih loh ang maia Vana a vawklallen avangin hmachhawn ngei a duh.

Electric Veng, Lunglei boxer hian 2022 National Games middleweight-ah Mizoram tan silver medal a hnek chhuak tawh a, Mizo mipui hriat hlawh leh zual turin a theihna pho chhuah ngei a tum a ni.

Mala chuan, "Johnkenty Vanhlimpuia hi Mizoramah hneh loh nei lo ang a nih avangin a vawklallen riauin ka hria a; chuvangin ani nena inhnek hi ka duh a, a phurawm tawh hlein ka hria,” a ti.

Fight Night-ah hian inhnek vawi ruk a awm dawn a, bantamweight-ah round ruk awh turin Laldinsanga leh Ramdinthara, round li turin welter-ah Lalruatzela Hauzel leh Lalmuanpuia, superfly-ah Vanlalenkawltira leh Lalrinngheta an inhnek ang.

Round thum turin lightfly-ah Emmanuel Vanlalthlengliana leh Benjamin Lalrindika bakah Khelo India State Centres of Excellence hnuaia inzir lai L. Joseph Buihringpachha leh H. Zomuanpuia an inhnek dawn bawk.