A vawi thum nan Sindhu inlan dawn

PV Sindhu chuan a zawna a vawi thum nan Olympic a hmachhawn dawn, nipui laia neih tur Paris Olympic 2024-ah Sindhu hian India aiawhin hmeichhe badminton singles match a khel dawn a ni.

Tun hmain Sindhu hian Rio Olympic-ah khan silver medal a lo la tawh a, Tokyo khawpuia inelna neih a nih ṭum khan bronze medal a vaw chhuak tawh bawk, kuminah a pathumna a beisei ang.

Olympic hi a duh nazawng tan khelh theih a ni ngawt lo. Nikum May 1 aṭanga kumin April 30 chhunga an chet dan aṭanga teh an ni a, Badminton World Federation hnuaia ranking sang zual 16 chauh an tel thei ṭhin.

Mipa singles lamah India tan H.S. Prannoy leh Lakshya Sen te an inlan phak dawn bawk a, ram pakhat aṭangin inelna pakhatah hian singles player pahnih bak neih theih a ni lo.

Mipa leh hmeichhe singles player 16 ve ve an inlan thei a, a thlengtu rama an number 1 chu a tling phak lo a nih pawhin thlengtu an nih avangin a tling nghal mai ṭhin bawk.

Asian Games gold medallist Satwiksairaj Rankireddy leh Chirag Shetty te ṭangdun chu mipa doubles huangah an inlan thei dawn a, anni hi seeded pathumna an ni phak ang, team pariat an inel dawn a ni.

Mipa, hmeichhia leh mixed doubles huangah hian ram pakhatin pair an nei tam thei lo, pahnih zel an neih theih avangin India hmeichhe doubles pair Ashwini Ponnappa leh Tanisha Crasto te chu an ranking sang lo mah se an tel theih phah.

Mixed doubles huangah erawh India hian aiawh a nei phak dawn lo a ni.