SYS FC leh Chawnpui an inhnehtawk

LZ Juice MPL11 tihmuhnawmtu zingah SYS FC an tel dawn. Naupang ṭha rual awm khawmna SYS FC hian Inrinni khan MPL9 champion Chawnpui FC an chelh a, 1-1 in an inhnehtawk. SYS leh Chawnpui hian tun inelnaah hneh loh a la tawng lo ve ve.

Coach Lalmuankima kaihhruai SYS FC hian training an nei ṭha a, an kum chawhrual kum 18 lek ni mah se team ṭha zinga mi Chawnpui lakah an khel ṭha zawk. Chawnpui keeper RVL Nunmawia (Buanga) chu man of the match-a thlan a ni hial.

Chawnpuiin SYS lakah chak ngei an tum a, MK-a hoten an hlau bik lo. Chhun pachanga inkhelah fitness nei ṭha zawk SYS an chungnung hret a, inchhuang thei erawh an ni bik lo.

Second half-ah goal hmuh tur a awm chauh a, Chawnpui left back Zothansanga'n minute 51-naah set piece aṭanga ball kal chu buai deuh nuaih karah a khung. SYS-in goal an chhuah hnuah an nawr na sawt a, an phu ang ngeiin goal an sual chhuak.

Captain F. Malsawmtluanga'n mual vei lam aṭangin freekick a pet a, a ball vawrhluh ṭha chu H. Lalhumhima'n Chawnpui defender-in a veng chungin ṭha zetin a tauh lut. Goal kilah a luh avangin keeper Buanga tan dan ngaihna a awm lo.

SYS FC khel ṭha hret mah se Chawnpui lam pawhin chance ṭha an nei a, J. Lalbiakliana'n (Valpuia) box pawn aṭanga ṭha zeta petin goalkeeper Joseph Laltluangpuia'n a dang. Chawnpui defender Laltluangliana pawhin hun tawp dawnah chance ṭha a hlah bawk.

Chawnpui leh SYS te 1-1 in an inhnehtawk a, MPL11-a semifinal lut tur hriatthiam a har phah hle. Coach MK-a enkawl SYS hi an khelh dan aṭangin semifinal an beisei ngam dawn niin a lang a, chutihrualin July 18, Ninganiah Mizoram Police an hmachhawn dawn. Police laka an chet dan hmang hian SYS hmalam tur chu thui tak a thlir thiam theih ang.