Copa America pathumna Uruguay

Hun tawp dawnah Luis Suarez chuan an si phurh a sut zo hram a, 2-2 a an inhnehtawk hnuin penalty shootout-ah Uruguay chuan Canada 4-3 a hneh zuiin Copa America 2024 pathumna an ni.

Nimin zing pathumna zawnnaah Uruguay tana Rodrigo Bentancur-a goal hmahruai chu Canada lamin Ismael Kone hmanga an sut bakah Jonathan David chuan a khung belh a, 2-1 a chak tura rinkai an ni hman.

Mahse, hun pek belh tawp dawnah Suarez chuan goal a rawn khung. Liverpool striker hlui hi kum 37, thla nga leh ni 21 mi a ni tawh - Copa America tournament-a goal khung thei upa ber a ni hial.

Penalty hmanga chak zawk zawn chhunzawm niin, Uruguay goalkeeper Sergio Rochet chuan a vawi thumnaa pettu Kone-a chu a lo dansak a, a hnuhnung bera pettu Alphonso Davies chuan goal zawnah a pet lo bawk.

Canada lamin an pet hmasa a, pahnihin an hlah laiin Uruguay tana pet hman mi pali - Federico Valverde, Rodrigo Bentancur, Giorgian de Arrascaeta leh Suarez te chuan an khung vek thung a ni.

Uruguay coach Marcelo Bielsa chuan, "Ropui takin kan khel chhuak lem lo, goal hnih ve ve khunga inhnehtawk pawh kha thil awm tak a ni, kan khingpuite khan tharum an hman nasat avangin inkhelh a harsa bawk.

"Player ten hun rei tak chhung season an hmang a, chumi hnuah tournament hautak tak kan khel chhunzawm leh a ni a, hahdam deuh zawka awmna hun awm se la chuan tuna aia Uruguay ṭha zawk hi kan chhawp chhuah theih ka ring," a ti.

Tukin hian Argentina leh Colombia ten final an khel a, captain Lionel Messi leh a ṭhiante an champion a nih chuan a vawi 16-na a ni dawn a, champion tam lama Uruguay nen record inṭawm an neih mek chu an kalsan ang.