Football inelna lian zinga mi European Championship 2024 khel tur ram a chiang kim - Ukraine, Poland leh Georgia te chuan playoff hmangin hmun ruak pathum la awm chu an hnawhkhat, ram 24 an inlan dawn tihna a ni.

Euro 2024 hi Germany chuan kumin June 14 aṭanga July 14 chhung hian a thleng dawn a, ram 24 awmte chu group parukah ṭhen hran niin group khata awmte an inkhel kual vek ang - match hmasa berah Germany leh Scotland te an inkhel dawn.

Ukraine an tlang

Ram buai leh indona karah Ukraine chuan Euro 2024 an khel dawn, hmun ruak inchuhna inkhel pawimawhah Ukraine hian Iceland chu 2-1 a hnehin an tlang - goal an phurh hmasak hnuah an lehthal a ni.

An ram a buai avangin anmahni khelmuala inkhel tur ni mah se Poland ramah mikhual an thleng. Mikhual chan chang zawk Iceland chuan minute 30-naah Albert Gudmundsson hmangin goal an nei hmasa. Box pawna a ball dawn chu vir puiin amah vengtu a bum a, chumi hnuah mawi zet maiin goal kilah a thlawh lut.

Serhiy Rebrov-a naute hian chawlhlawk hmain si phurh sutah inngai mah se offside vanga hnawlsak an ni. Second half-a Viktor Tsygankov khung erawh sawisel tur a awm lo, a through ball dawn chu a insiamrempui hnuah chiang takin a khung.

Ukraine an phur zui - Mykhailo Mudryk chuan chakna goal a khung. Player hmuhnawm leh ball pet thiam tak Heorhiy Sudakov siamsak chu Chelsea forward hian laklawh nei miah loa pet nghalin a goal mawi hle.

Ukraine captain Oleksandr Zinchenko chuan, "Kan tan chuan inkhel hlu tak a ni, ram tana tha thawhtu leh zalenna kan neih theihna atan thawktu zawng zawngte tan kan hnehna hi ka hlan," a ti. A zawna a vawi li nan Euro hi an khel dawn.

Wales aia vannei Poland

Cardiff City Stadium-a inkhelah goal a lut lo a, penalty shootout hmangin Euro khel tur zawk chinfel a ni. Mikhual Poland tan pettuten an khung vek laiin Wales forward Daniel James-a pet chu Wojciech Szczesny chuan lo dansakin 5-4 in an chak.

Robert Lewandowski awmna Poland hian minute 120 chhungin goal zawna pet an nei miah lo, mahse a tawpa tlang zawk an ni ta daih. Group D-ah France, Netherlands leh Austria te nen an awmkhawm dawn a ni.

Inkhel pangngaiah mualneitu Wales lamin goal an nawr na zawk - Wales captain Ben Davies tauh luh chu offside vanga hnawlsak a ni a, a hnu lamah Kieffer Moore-a tauh pawh Szczesny chuan ṭha takin a lo dansak bawk.

Wales manager Robert Page chuan, "Kan chak lo hi a hrehawm ka ti a, kan chak loh dan kha a nain infiamna hi a lehlamah chuan a nun a rawng hle tih a takin kan hmu, ka naute khelh dan leh thlen chin erawh a chhuanawm ka ti hle," a ti.

Poland tana penalty dangtu Szczesny chuan, "Football hian hlimna leh lungngaihna min thlen nasa tawh, tun ṭum hi kan tan lawmna hun a ni. Chutihrualin kan khingpuite tawrhna pawh kan hriatthiam a ngai," a ti. Michal Probierz pawhin chapo thei an nih loh thu a sawi ve bawk.

Vawi khat nan Georgia

Georgia ram chuan football huangah bung thar an kai, an ramin a vawi khat nan major tournament an khel dawn - Greece nen goal awm loa an inhnehtawk hnuin penalty shootout-ah 4-2 in an chak a; Euro 2024 khel turin an tling.

Inkhel a zawh rualin Georgian mipui tam tak chu khelmual chhungah an tlan lut. Kum 1990 aṭang khan anmahni ram pualin football an khel ṭan - hetih lai hian Soviet Union peng pakhat an la ni, major tournament qualifying vawi 15 an khelh naah an tling ta chiah.

Willy Sagnol-a enkawl team tan Nika Kvekveskiri, Lasha Dvali, Zuriko Davitashvili leh Giorgi Kochorashvili ten penalty an khung vek a, an goalkeeper Giorgi Mamardashvili chuan an khingpui lam pet a lo dansak bawk.

Group F-ah Georgia hi Turkey, Portugal leh Czech Republic te nen an awm dawn a ni. An ram mipui pawh mi 3,688,647 (kum 2022) vel chauh an ni a, Aizawl district chhunga mipui ai pawhin an tlem zawkin a rinawm, an tan chuan Euro khelh hi thil hlu bik a ni dawn chiang.

Georgia coach Willy Sagnol chuan, "Beiseina kan nei a, chumi ti hlawhtling tur chuan theihtawp kan chhuah bakah dawhtheih a ngai hle. Inkhelh pangngai bakah penalty thlengin kan zir ngawrh hle, a rah chhuah kan hmu ta a ni," a ti.