Germany an chak nawn

Julian Nagelsmann-a kaihhruai Germany-in France an hneh hnuah Netherlands 2-1 in an hneh a, inkhel pahnih hi friendly match ni mah se Euro 2024 atan inrintawkna an ngah phah sawt ang. Deutsche Bank Park, Frankfurt-ah Oranje-in Joey Veerman hmangin khung hmasa mah se mualneituin Maximilian Mittelstadt leh Niclas Fullkrug te hmangin an lehthal.

Thawhlehni zan inkhelah Memphis Depay-a ball pass ṭha chu Veerman-a'n ṭha zetin a volley lut a, Germany midfielder-ten an hna an thawk lo. Mahse, minute 11-naah VfB Stuttgart left back Mittelstadt-a'n box pawn chiah aṭangin Jamal Musiala ball pek chu mawi zetin a hlai lut.

Germany an chungnung hret a, a tawpah an vannei ta zawk. Minute 85-naah Toni Kroos-a cross chu Niclas Fullkrug-a'n a tauh lut. Nagelsmann chuan, "Hnehna kan chan hian nasa takin min pui ang," tiin a sawi.

Nagelsmann-a hote hian June thlatirah Ukraine leh Greece te nen friendly match an la khel dawn. Euro 2024 group stage match hmasa berah Scotland nen June 14, Zirtawpni zanah an inkhel dawn a; an group-ah hian Hungary leh Switzerland an awm bawk.