Copa America 2024 a 'hot' dawn

South America ram tana football inelna sang ber Copa America 2024 chu kumin nipuiah khelh a ni dawn. European Championship nen a inrual dawn a, nipuia club football chawlh laiin ram inelna football lian tham pahnih en tur a awm dawn tihna a ni.

Copa América vawi 48-na hi June 20 – July 14, 2024 hian khelh a ni dawn a, South America ram 10-te an tel vek dawn bakah CONCACAF aṭangin ram paruk an tel dawn. CONCACAF Nations League chu Copa America khel tur zawnna a ni a, finals khel pha United States, Mexico, Panama leh Jamaica te chu an tling Play in round aṭangin Canada leh Costa Rica te an inpetling bawk.

United States chuan tun ṭum inelna hi a thleng dawn a, US hian kum 2016 khan Copa America kum 100-na a lo thleng tawh bawk. Khawpui 14-ah inelna hi neih a ni dawn a, ngaihven a hlawh dawn.

FIFA World Cup champion Argentina chu group A-ah an awm a, Lionel Messi leh Angel di Maria te chu squad-a a awm chiang tura sawi an ni. Group B-ah CONCACAF Gold Cup champion Mexico an awm a, group C-ah CONCACAF Nations League champion United States an awm. FIFA World Cup-a record nei ṭha ber Brazil chu group D-ah an awm thung.

Copa America-ah hian Argentina hi champion lai an ni a, record nei ṭha ber niin vawi 15 ngawt an champion tawh a, chutihrualin Uruguay pawhin vawi 15 nomawi an chawi tawh bawk. Football ram ropui Brazil hi vawi kua an champion tawh a, South America pawn aṭanga champion thei an la awm lo.