Quarterfinal-ah Alcaraz a lut

Miami Open khelh laiah Carlos Alcaraz chuan nimin zing khan quarterfinal a inhlangkai. Spanish star hian Lorenzo Musetti chu 6-3, 6-3 a hnehin a thiam zual pariat zingah a inhlangkai.

Kum 20 Alcaraz hian a match lehpekah chuan Grigor Dimitrov a hmachhawn leh ang - Bulgarian tlangval Dimitrov hian inkhel dangah Hubert Hurkacz chu set thum an khelh hnuah 3-6, 6-3, 7-6 (3) in a lo hneh ve bawk.

Indian Wells champion Alcaraz hi tun ṭumah hian seeded pakhatna pek a ni a, champion tura rinkai leh buk rit pawh a ni. Alcaraz chuan, "Hliam leh harsatna nei miah loa inkhelh theih hi chu a nuam.

"Tun season chhunga ka hun tawn nuam leh hlimawm chu ka tawng mek," a ti. Tun hnaiah a zawnin match kua ngawt hnehna a chang ta, tun ṭumah hian a champion leh thei a nih chuan world number 1 Novak Djokovic a hnaih leh sawt ang.

Inkhel dangah Jannik Sinner chuan Christopher O'Connell chu 6-4, 6-3 a hnehin last 16 a paltlang a, player ṭha Daniil Medvedev pawhin Dominik Koepfer lakah 7-6 (7-5), 6-0 in hnehna a chang ve bawk.

Medvedev hian tennis a khelh hun chhungin match 350 a chak tling ta chiah. Russian tlangval chuan, "A chang chuan set khatna a chak tlang mai hi a harsat chang a awm, a hnu lamah erawh chau loa khel ṭha tluang thei nih a pawimawh," a ti.