RG Stadium-ah I League inkhel en tur a awm dawn; Zanin dar 8:00-ah Aizawl FC vs Churchill Brothers

Aizawl FC chuan zanin dar 8:00 hian RG Stadium-ah Churchill Brothers an mikhual dawn. Mizo club-in kumin I League-ah chak hmel an la hmu lo a, Goan club lakah point thum hlawhchhuah ngei an tum ang. B. Malsawmzuala kaihhruai Aizawl FC hian match 19-ah point 21 hmuin 11-naah an awm a, an hnuaia awm chu Manipur club pahnih Neroca leh Trau te chauh an ni.

I League aṭangin team pahnih an relegate dawn a, Mizo club hi chhiarkawp danin an la him lo. Chutihrualin season bul ṭan chhia Manipur club pahniha che ṭha zawk Neroca ai pawhin Aizawl FC hi match khata khel tlem chungin point riat ngawtin an hmu tam zawk.

Tlarhnung pawp

Nikum khan Aizawl FC an che ṭha a, kumina inelna chhunzawm dawn khan champion hial an la beisei pha. Mahse, Bobi Stojkoski kuta thuneihna an dah hnuah an talbuai a, Sawmtea kuta thuneihna a awm leh hnuah pawh an insiamṭha thei tawh lo.

Aizawl FC tlarhnung a pawp a, match hnuhnung pahnihah Mizo club-in goal sarih khung thei mah se goal kua ngawt an chhuah. AFC hi Gokulam Kerala (4-3) leh Inter Kashi (5-4) lakah an chak lo ve ve.

Mizo club hna hmasa chu tlarhnung tihphui a ni a, training-naah pawh goal venhim an zir nasa. Aizawl FC coach lailawk Sawmtea chuan, "Kan mamawh ber nia kan hriat chu defending a ni a, training-naah kan zir nasa. Kan hlawkpui ngei ka beisei," tiin Vanglaini a hrilh.

Aizawl FC-in inhliam vangin Joe Zoherliana an chhawr thei dawn lo a, Inter Kashi lakah goal nga an chhuah miau avangin tlarhnung an siksawi hret a nih pawhin a mak lo ang.

Record thar a hnai?

Aizawl FC-in goal venhim an ngai pawimawh dawn a, chutihrualin goal khung an thlah thlam a thiang lo. Mizo club vanneihna chu Lalrinzuala an kawl hi a ni a, Serchhip tlangval hian match 17 aṭangin goal 13 a khung tawh.

Rinzuala hi tun season I League-ah Indian zinga top scorer a ni mek a, I League awm tawha Indian zinga goal khung tam ber record siam thei dinhmunah a ding. Mohammed Rafi (2009–10) leh Sunil Chhetri (2013–14) ten season khatah goal 14 an khung a, Rinzuala tan nih rual turin goal khat chiah a ngai.

RG Stadium-ah ngei hian Mizo tlangvalin I League record thar hi siam se, Mizo tan a hlu lehzual ang. Chutihrualin Rinzuala record hlutna belhchhah theih nan Mizo club-in ṭantu ṭha an mamawh tel bawk ang.

Aizawl FC hian tun season-ah Churchill Brothers hi an la hmachhawn lo a, Goan club-ah hian Mizo player Lalremruata Ralte leh Lalawmpuia Sailo te an awm. Churchill hian point 24 an hmu a, Mizo club hi an chak a nih chuan Goan club chungah an awm thei ang.