England mualphona hliahkhuhtu Bellingham

Thawhlehni zan khan interna-tional friendly match-ah England chuan Belgium an mikhual a, hun pek belhah Jude Bellingham goal hmangin 2-2 in an mikhual hi an inhnehtawkpui hram.

Belgium tan Youri Tielemans chuan vawi hnih ngawt hmahruaina goal a khung a, Three Lions-in Ivan Toney-a penalty leh Bellingham-a goal hmangin an chhanglet a, an mikhual lakah an mualpho lo hram.

England hian Pathianni zan khan Wembley Stadium-ah Brazil chu 1-0 in an lo ngam lo tawh a, a zawna an muala an tlawm tur chu Bellingham-a'n a chhanhim hram - Euro champion beisei tan result ṭha a ni lo.

A harsa

Inkhel ṭantir lamah England goalkeeper Jordan Pickford a fimkhur tawk lo a, a ball petchhuah sual zar zoin Aston Villa midfielder Youri Tielemans chuan minute 11-na lekah goal hmahruai a khung a, Wembley Stadium a reh ruih!

Minute erawh a liam tam hman lo. England-in Toney hmangin penalty an hlawh chhuak a, Three Lions tana a bul ṭan hmasak berah Brentford striker hian goal khung nan a hmang - England tan match hnih a khelhna chiah niin, a goal hmasa ber a ni.

Mahse, England an chesual nawn. Brighton & Hove Albion defender Lewis Dunk chu ball petchhuah a tumna lamah a tawlh thlu a, hemi nangchingtu Romelu Lukaku chuan ṭha taka ball thlawh lutin, Tielemans chuan an goal hnihna ni turin a tauh lut.

A tawpah Jude

Brazil laka an tlawm ṭuma chesual tawh Dunk tan international break duhawm lo a ni a, Euro 2024 squad-a tel turin Premier League lamah a khelh ṭhat chhunzawm viau a ngai ang - Three lions-in 2-1 a hnufualin chawlhlawk an hmang.

Rei tak chhung goal dang a lut lo a, Wembley-ah Three Lions hi an tlawm mai dawn niin a lang hman. Hun pek belh minute nganaah Bellingham a inlar a, Real Madrid midfielder hian si phurh sutna goal chiang zetin a khung.

England boss Gareth Southgate chuan, "Jude bawk a langsar leh ta. A chak duhna, tih hram hramna, a tawp thlenga beih hram hramnate kha goal a khung chhan a ni. Mahse, hei hi kan team pumpuiah khan ka hmuin ka hria a, team ṭha tak lakah kan hnufual chungin kan tho leh thei. Zanin ka thil hmuhte hian min tilawm a ni," a ti.

England vanduaina

Three Lions vanneih zan ni se, chak thei an ni - Jarrod Bowen goal khung chu offside vangin pawm a ni lo a, Belgium keeper Matz Sels chuan ṭha zetin a dansak bawk.

Bellingham pawhin goal khung mah se, a tir lamah khung ngeina tur nia langah vawi thum vel ngawt a khung lo a, a vanneih zan a ni lo. Kum 20 mi midfielder chuan, "Chak zo lo ta ila, min sawisel dan tur zawng zawng ka ngaihtuah a, kan draw hram chu ka lawm hle.

"Player tam takin ram tana an match hmasa ber an khel a, ka la khelhpui miah loh an awm nual bawk. Chuti chung chuan vawi tam chance kan insiam a, hun pek belh hma khan goal khung thei hial ka ni a, ka tihsual ka thup thei chu ka lawm hle," a ti.

Golden generation?

England tan kum 18 mi Kobbie Mainoo a hmuhnawm takzet a, defensive midfield-ah Declan Rice nen inkawpin, an hmaah Bellingham a awm a, Real player hi West Ham forward Bowen leh Manchester City fachuam Phil Foden ten an la thlawp thei bawk.

Tun season-a goal 22 khung tawh Ollie Watkins chu bench-ah dah niin, a aiah Toney a lut. Tlarhnungah Ezri Konsa, John Stones, Dunk leh Ben Chilwell te an ding tlar a, England hi an chhe mawlh lo.

Hliam vangin Harry Kane leh Bukayo Saka an tel lo a, bench-ah Jordan Henderson hoin Chelsea thiampuipa Cole Palmer leh Conor Gallagher, Manchester United forward Marcus Rashford leh Tottenham Hotspur attacking midfielder James Maddison te an la awm thei - England golden generation thar an ni mai lo maw? Hunin a hril ang.