Afghanistan hmaah India an mualpho

March 2024 international break-ah India-in match hnih an khel a, chak an nei lo. An hmachhawn maw? FIFA ranking-a 158-na, an ram buai vanga mahni rama home match pawh khel thei lo Afghanistan an ni. Ni e, Afghanistan lakah India an tlawm a, Thawhlehni zan khan 2-1 in an ngam lo.

FIFA World Cup 2026 qualification (AFC) second round-ah India hi an inlan a, Afghan nen an intawn hmasakah 1-1 in an inhnehtawk. Inkhel hmasaah Saudi Arabia-ah an inkhel a, boruak a danglam avangin Blue Tigers tan chhuanlam a neih theih.

Thawhlehni zana an intawnna hmun erawh Indira Gandhi Athletic Stadium, Guwahati a ni a, India tan chhuanlam neih a thiang lo. Sunil Chhetri penalty hmangin Blue Tigers hian goal khung hmasa mah se, Rahmat Akbari leh Sharif Mukhammad (penalty) hmangin Afghanistan-in an chhanglet.

Sorry Chhetri!

India tan captain Sunil Chhetri chuan ram tana a match 150-na a lawm a, inkhelh hmain Bengaluru FC forward hi AIFF chuan lawmpuina thilpek an hlan - minute 38-naah Chhetri hian goal hmangin ram tana a match 150-na a lawm zui a, Afghan captain Haroon Amiri handball vanga penalty hlawhchhuah chu goal-ah a chantir.

Kum 39 mi Chhetri hian ram tana a match hmasa berah goal a khung nghal a, match 50-na, 100-na leh 150-naah goal a khung vek - India tan goal 94 a khungna chiah a ni a, international football-a goal khung tam palina a ni mek.

Mahse, Chhetri tana zan chhinchhiah tlak hi India mualpho zanah a chang zui. Georgian top flight league club Torpedo Kutaisi midfielder Rahmat Akbari chuan minute 70-naah si phurh sutna goal a khung a, Russian club Anzhi Makhachkala player hlui Mukhammad chuan penalty hmangin chakna goal a khung zui.

Bang rawh se

Inkhelh zawhah Indian football fan-ten, "Stimac bang rawh se," an ti a, team bus a luh dawn thlengin Croatian coach hi bang tura an duh thu an au pui. Hetihlai hian fans ṭhenkhat chuan stadium pawnah, "Thawm bengchheng satliah mai an ni. AIFF hi rukru an ni," an ti bawk.

Blue Tigers hian Afghanistan hneh se, third round luhna chance a inhawng zau. Mahse, an chak lo miau a, hmabak a ko ta hle. Fan-te an lawm lo hi a awm a, inkhel thlirtuten fans lungawi lohna an pawmpui ang.

Chhetri-a'n hma takah goal khungna remchang nei mah se post a tihper a, Manvir Singh-a'n match hmasa ang thoin a chance neih a chhawr lo a, Afghan lam si phurh sut dan a ho hret a, keeper Gurpreet Singh Sandhu-a'n ṭul loah penalty a chawi bawk.

Beiseina a awm

India tan Lalengmawia Ralte (Apuia) chuan inkhel bul a ṭan a, Lallianzuala Chhangte chu minute 68-naah Chhetri thlakin a lut. Lianzuala chuan, "Kan theihtawp kan chhuah a, mahse, a vanduai zawkah kan ṭang ta a ni.

"A khelh phei chu kan khel ṭha zawkin ka hria a, kan chance neih kan duh anga kan chhawr ṭangkai thei lo leh, penalty kan chawi leh kher kha a pawi ta a ni," tiin Vanglaini a hrilh.

India hi group A-ah pahnihna ni mekin, Kuwait leh Qatar an la hmachhawn leh dawn a, Mumbai City forward LZa chuan, "Third round luh beiseina kan la nei a, mahse, Kuwait hneh ngei ngei erawh a ngai dawn," a ti.

Stimac a bang dawn lo

Croatian coach Stimac-a'n June 2026 thleng India-ah contract a nei a, a contract zawh hma chu ban a tum lo. Stimac chuan, "He hmunah hian ka hnate hlen tura lo kal ka ni a, a hun hmaa ban ka tum lo," a ti!

Stimac chuan, "World Cup qualifier third round kan thlen theih ka la ring reng a, camp rei zawk kan neih hunah chuan team danglam daih kan ni dawn. Ka player zahve deuhthaw kha thatho takin an inkhel thei lo a, ni nga chhung lekin ka thlak danglam thei lo a ni," a ti a, chhuanlam a nei ve zel.

Afghanistan coach Ashley Westwood chuan, "Inkhel kan thunun a, hnehna chan tumin kan bei. India-in vawi sarih shot an neih laiin keinin vawi 12 kan nei a, Indian team ṭha tak laka target-a vawi nga shot neih theihte kha a hlu a, kan phu angin kan chak a ni," tiin a sawi.