Champion lai Chennai Super Kings chak zawn

Indian Premier League vawi 17-naah champion lai Chennai Super Kings chuan March 26, Thawhlehni zan khan Gujarat Titans chu 63 runs-in an hneh. CSK hian over 20-ah 206/6 runs an siam a, Gujarat hian 143/8 runs chauhin an chhanglet.

Zanin dar 7:30 hian Rajasthan Royals leh Delhi Capitals te an inkhel ang a; March 29, Zirtawpni zanah Royal Challengers Bengaluru leh Kolkata Knight Riders te an inkhel bawk ang.

CSK tan Ravindra

Cricket ngainatute tan chuan Rachin Ravindra hi mi thar a ni tawh lo a, Indian thisen kai hi New Zealand international cricketer a ni. Kum 24 mi Ravindra hi Wellington-ah a piang a, a pa Ravi Krishnamurthy hi New Zealand-a a pem hmain Bangalore-ah club level cricket a khel ṭhin.

Rachin Ravindra tih hi Sachin Tendulkar leh Rahul Dravid te hming aṭanga lak niin sawi a awm a, amaherawhchu a pa Ravi Krishnamurthy chuan a nih loh thu a sawi thung.

Ravi Krishnamurthy chuan, "Rachin-a a pian hian a nuin a hming tur hi a phuah a, lam a awl bakah a rik nalh avangin awlsam takin kan pawm. A hnu feah Rahul leh Sachin te hming nen a rik dan a inang tih kan hria a, mahse an hming chawia sak chu a ni lo," tiin a sawifiah.

Rachin hi 2023 World Cup-ah hming a chher a, CSK-in nuai 180 hlawh turin an lalut. New Zealand opener hian Royal Challengers Bengaluru an hneh ṭuma 37 runs a siam hnuin Gujarat Titans lakah 46 runs a siam a, ball 20 chiah a mamawh bawk.

An ṭha rual

CSK tan hian Ravindra chauh a che ṭha lo a, bul a ṭanpui Ruturaj Gaikwad pawhin 46 runs a siam. Shivam Dube-a'n 51 runs siam bawkin over 20-ah 203/6 runs an siam a, chak turin an dinhmun a ṭha nghal.

Titans tan target a sang mah mah a, Wriddhiman Saha (21), Sai Sudharsan (37) leh David Miller (21) te run siamin mualphona a hliah khuh zo lo. Mikhual team hian over 20-ah 143 runs chauh an siam a, CSK hi 63 runs-in an chak.

IPL kalphung

IPL-ah hian team 10 an awm a, group pahnihah ṭhen an ni. Group A-ah Rajasthan Royals, Kolkata Knight Riders, Mumbai Indians, Delhi Capitals leh Lukcnow Super Giants te an awm. Group B-ah Chennai Super Kings, Punjab Kings, Royal Challengers Bangaluru, Gujarat Titans, Sunrisers Hyderabad te an awm.

Team pakhatin an group-a awm lo team-te hi vawi hnih ṭheuh (home leh away) an hmachhawn a, an group-a awm te hi vawi khat ṭheuh an hmachhawn bawk. Season khatah team khatin group match vawi 14 ṭheuh an khel dawn tihna a ni.

Group match-a ti ṭha paliin playoff an khel dawn. Qualifier 1-ah pakhatna leh pahnihna an inkhel ang a, a chak zawkin final an lut nghal. League round-a pakhatna emaw pahnihna emaw nih a pawimawh hle.

Pathumna leh palina ten eliminator round an khel dawn a, heta chak zawk hi qualifier 2 khel turin an tling a, a chak lo zawk an tla. Qualifier 2-ah qualifier 1-a chak lo zawk leh eliminator round-a chak zawk an inhmachhawn ang a, a chak zawkin final an lut ang.

Kumin final hi M. A. Chidambaram Stadium, Chennai-ah May 26, Pathianniah khelh a ni ang.