Azarenka beiseina a la nung

Victoria Azarenka chuan a vawi li nan Miami Open nomawi chawi a la beisei zel. Quarterfinal inkhel hmuhnawm takah Azarenka hian Yulia Putintseva hnehin semifinal a lut.

Thawhlehni zan inkhelah Azarenka hian 7-6 (7-4), 1-6, 6-3 in hnehna a chang, chak tur hian darkar thum deuhthaw hun a mamawh, final lut tur chuan seeded palina Elena Rybakina a paltlang leh a ngai dawn a ni.

Inkhel dangah world number 4 Rybakina-i hian seeded pariatna Maria Sakkari chu 7-5, 6-7 (4-7), 6-4 in a lo hneh ve hram bawk. Ranking sang zual pathum an tlak tawh avangin Rybakina hi player la dam zingah a sang ber.

Kum 24 mi Rybakina chuan, "Set khatna kha minute 45 chhung kan khel a, a hahthlak takzet a ni. Hetiang inkhel hautak leh harsa ka paltlang thei hi ka lawm," tiin a sawi.