Spain 3-3 Brazil Inkhel a hmuhnawm

Thawhlehni zan khan Santiago Bernabeu-ah Spain leh Brazil te friendly match khelin an intawng a, 3-3 in an inhnehtawk - Spain tan Rodri chuan penalty hmangin goal hnih a khung a, Dani Olmo chuan goal khat a thawh ve bawk.

Spain hian minute 36 chhunga goal hnih khungin, 2-0 in hma an hruai a, Real Madrid forward Rodrygo leh season thara Real pan tur Endrick-te chuan Brazil tan an chhanglet a, 2-2 a ni.

Mahse, minute 87-naah Rodri chuan penalty hmangin a khung leh a, Spain an chak ngei dawn niin a lang. Mahse, hun pek belhah Brazil vanneihna her chhuak ve thungin, penalty an hmu ve leh a, Lucas Paquetá chuan goal-ah chantirin, 3-3 in inkhel a tawp.

Team pahnih inkhelh hmain Brazil forward Vinicius-a'n a vun rawng vanga hmuhsit a tawh ṭhinna chuan inkhelh chawlhsan mai châkna thinlung a pek hial thu a sawi a, Brazil player-te chuan inkhelh hma hian jacket dum, "One Skin, One Identity," (chi khat, nihna thuhmun) tih inziahna chu hain, Vinicius an thlawpna an lantir.

Heti chung hian fans ṭhenkhat chuan inkhelh hmain Vinicius an au el tho a, he inkhel atana Brazil captain armband hrengtu forward hi minute 71-naa lakchhuah a nih erawh chuan Bernabeu-a inkhel entuten kut bengin an thlawpzia an lantir.

Inkhelh hmain, a chhehvel boruak vangin Vinicius a langsar a, an inkhelh meuh erawh chuan kum 16 mi Lamine Yamal a langsar ber - Spain goal khung pathumah hian a inrawlh vek!

La Roja penalty hmasa ber hi a hlawhchhuah a ni a, Olmo goal khung tur a siamsak a, an penalty pahnihna an hlawhchhuah dawn hian a ball pek luh chu Dani Carvajal-a'n tlan luhpuiin, Brazil defender Lucas Beraldo chuan a lo titlu - penalty an hlawh chhuak a, goal-ah an chantir zui.

Hun pek belh minute hnihnaah Yamal hi lakchhuah a ni a, Bernabeu-a inkhel entu fan-te chuan ding chungin an zahna an lantir hial. Brazil forward Endrick sawi hmaih a thiang lo - England lakah ram tana a goal hmasa ber a khung a, Spain lakah a khung leh ta.

Kum 17 mi forward hian Palmeiras tan a khel mek a, season thara Real zawm turin an inrem fel tawh. Season thar El Clasico-a Yamal leh Endrick inhmachhawn tur vel hi en a châkawm tawh hle.

Luis de la Fuente enkawl Spain-in tun international break-ah chak an nei lo a, Brazil nen an inhnehtawk hma hian Colombia chu 1-0 in an ngam lo tawh. Brazil erawhin match hmasa zawkah 1-0 in England an hneh thung.