France chakna Giroud

France tan kum 37 mi Olivier Giroud a la vul reng. AC Milan striker hian Les Bleus-in Chile 3-2 a an hneh ṭumin chakna goal a khung. Arsenal striker hlui Giroud hi season tharah chuan MLS club Los Angeles FC zawm tura sawi a ni.

Stade Vélodrome, Marseille-ah Thawhlehni zan khan friendly match hi khelh a ni a, Germany laka chak lo France tan Chile hneh hi a pawimawh.

Minute rukna lekah Chile-in Marcelino Nunez hmangin an khung a, France tlarhnung pawp lam ai mahin mikhual team hian an ṭhiat ṭha hrim hrim.

Mahse, team ṭha zawk France an insiam. Minute 18-naah Youssouf Fofana-a'n box pawn aṭangin goal kilah tak a pet lut. Minute sarih hnuah Randal Kolo Muani a tauh goal leh a, France dinhmun a ṭha.

Second half-ah Kolo Muani thawhrah sengin Giroud-a'n minute 72-naah chiang zetin a pet goal. France tana goal khung tam ber Giroud-a'n ram tan goal 57 a khung tawh.

Chile-in Dario Osorio hmangin minute 82-naah siphurh an sut ṭhen a, goal dang hmuh tur a awm tawh lo. France 3-2 in an chak. Didier Deschamps-a'n Germany an hneh loh ṭum aṭangin player ṭhahnem tak a siksawi a, captain Kylian Mbappe leh midfielder Aurelien Tchouameni te chauhin bul an ṭan nawn. Les Bleus-in player ṭha an kawl hnem avangin Euro 2024-a bul ṭan pha turin club tana chet ṭhat a pawimawh ang.