India ram pum huap inelna National Games 2023 neih laiah Mizoram chuan medal pakhat a lak belh dawn tih a chiang tawh. Mipa boxing inelna huangah nimin khan Zorammuana (Valtea) chuan a khingpui Goa mi hnehin final a lut.

Tuipui tlangval Zorammuana hi under 51kg huangah a khel. Thawhṭanni khan quarterfinal-ah Zorammuana hian Haryana boxer Yogesh-a chu 0-5, 3-2, 3-2 (unanimous decision) in a hneh a, nimin khan semifinal a khel zui.

Inelna hi Goa-ah neih niin, nimin khan tualchhung boxer Roshan Zamir a hmachhawn zui a, inhnek hmuhnawm takah Valtea hi 4-1, 4-1 a chakin final a lut, vawiin tlai lam hian Services Sports Control Board boxer Bishwamitra Chowgatham nen gold medal an inchuh zui leh ang.

Valtea chuan, "Theihtawp ka chhuah dawn, ka khingpui tur hi boxer ṭha tak ni mah se Mizoram tan gold medal hnek chhuah ngei ka tum dawn a ni," tiin Vanglaini a hrilh a, Mizo mipuite ṭawngṭai pui turin a sawm nghal bawk.

Tuipui tlangval hian kum 2015 aṭangin boxing a khel ṭan a, tualchhung boxing inelnaah chuan district hrang hrang inelna huangah a khel tawh. Kumin tir lam khan Senior National Championship a khel a, silver medal lain National Games hi a khelh theih phah ta a ni.

Nimin tlai thleng khan Mizoram hian National Games 2023-ah medal pali an la tawh a, pakhat an lak belh dawn tih a chiang tawh bawk. Weightlifting leh taekwondo huangah gold medal pakhat ve ve la tawhin, taekwondo hian silver medal pahnih an la tawh bawk.

Mizoram tan hian nimin khan Lallawmawmi chu Judo -48kg huangah a inlan a, quarterfinal-ah Uttar Pradesh mi a hneh lo. Lalnuntluangi pawh 10m rifles huangah shooting inlan a, qualifying round a paltlang zo lo.

November 9, Ningani hian Fabian Lalrinliana chu 10m shooting-ah a inlan leh dawn. Fabian-a leh boxer Valtea te chauh hi Mizoram tana inelna hmabak la nei an ni.

National Games 2023-ah hian nimin tlai thleng khan Maharastra chuan medal 199 la tawhin an che ṭha ber a, table hmahruaitu an ni. Inelna hi November 9, Ninganiah a hmawr bawk a ni ang.