A thiam ho zingah Swiatek a thiam ber

Hmeichhe tennis thiam zual pariat inelna WTA Finals 2023 khelh zawh a ni a, a thiam bikte inelna huangah hian Iga Swiatek-i a chungnung ber a, world ranking lamah pawh dinhmun sang ber a luah chhunzawm leh nghal a ni.

Cancun, Mexico-ah Thawhṭanni zan khan WTA Finals hmawr bawkna hi neih niin, seeded pahnihna Swiatek hian a khingpui seeded pangana Jessica Pegula chu 6-1, 6-0 in a sawp a, a champion avang hian world number 1 dinhmun chu Aryna Sabalenka nek chhuakin a luah.

Kum 22 mi Swiatek hian a tir aṭangin inkhel a thunun hneh hle a, harsatna lian tham engmah a tawk lo tia sawi theih a ni. American player hneh tur hian minute 59 bak a mamawh lo, darkar khat an inkhel tling lo tihna a ni.

Kum 2021 khan Petra Kvitova chuan khatih hun laia kum 21 mi chauh ni chungin WTA Finals nomawi hi a lo chawi tawh a, ani hnu lamah chuan Swiatek hi champion thei naupang ber a ni hial.

Swiatek chuan, "Season tluana min thlawptu ka team chungah lawmthu ka sawi, chet fuh loh chang leh harsatna ka tawh chang pawhin anni hi ka kiangah an awm reng ṭhin.

"Ka chet fuh niah pawh ka tan an awmreng tho a, anni nena hun ka hmang thei ṭhin hi ka lawm. Tun season hi duhthusama ṭhain hmang lo mah ila, a hmawr kan bawk dan hi a duhawm hleah ka ngai," tiin a sawi.

Swiatek hian set khatna an khelh laiin game linaah a khingpui service a chhuhsak a, 3-1 a hma a hruai hnuah kal fal zuiin minute 27 chhungin set hmasa zawk a la.

Set hnihnaah phei chuan Swiatek-i'n a service a hum vek a ni satliah lo a, a khingpuin service pawh a chhuhsak vek! Tun season kal laia WTA title parukna la turin atan hna a awlsam hle - awlsam taka a chak theih chhan erawh a ṭhat vang a ni.