Arsenal tan intih phur hun

Premier League lamah an beisei ang result an neih loh avangin Arsenal an ngui a, tunah chuan Champions League lam an hawi leh rih a ngai - zanin dar 1:30 hian Emirates Stadium-ah Sevilla an lo mikhual ang.

Sevilla khelmualah Gunners hian 2-1 in hnehna an lo va chang tawh a, tun ṭumah chuan North London-a inkhel tur an nih avangin chak tura rinkai leh buk rit zawk pawh an ni - chutihrualin Spanish club hi zuam sual theih tur chi an ni.

Mikel Arteta nauten an league match hnuhnungah Newcastle United an hneh lo, an chak loh danah an lawm loh avangin coach Arteta mai bakah club lamin thu chhuah an siam hial a, an chungah eng thil nge thleng zel dawn hriat a la ni lo.

Magpies laka goal khung thei lo Arteta nauten Sevilla lakah khung an tum dawn - striker Gabriel Jesus a la dam loh avangin Eddie Nketiah a luh a ngai dawn a, chutihruain Spanish manager hian Nketiah a chhawr ngei ang em tih sawi lawk a harsa.

Leandro Trossard leh Kai Havertz te hi tlarhma laia khel thei an ni a, a sirah Gabriel Martinelli leh Bukayo Saka ten an thlawp thei ang. Captai Martin Odegaard dinhmun a la chiang lo, ani hi a khel thei lo a nih chuan an goal nawr a nep deuh ṭhin.

Arsenal hian UCL group match pathum aṭangin point ruk an hmu tawh a, zaninah hian an chak a nih chuan last 16 lut turin an dinhmun an siamṭha zual ang. Group B inkhel dangah PSV chuan Lens an lo mikhual thung ang.