Mizo pa enkawl Aizawl FC an chak

Aizawl FC-in Hyderabad-ah I League hmahruai mektu Sreenidi Deccan chu first half-a R. Ramdinthara goal leh hun tawp dawna Rohmingthanga Bawlte goal ropui hmangin 2-1 in an hneh. Mizo club hi Mizo coach B. Malsawmzuala kaihhruaina hnuaiah an khel a, Sawmtea hnuaia Aizawl FC-in I League an hmachhawn hmasa berah hnehna an chang.

Bench aṭanga lut Rohmingthanga hian tawnhriat nei ṭha keeper Ubaid C.K chhuak a hmu a, Mizot tlangval hian halfway line thlen hma aṭangin Dempo, East Bengal leh Gokulam Kerala keeper hlui hi a pet khum - ropui tak a ni.

Khelh dan thar

Aizawl FC-in match hmasa bera Mohammedan SC an hmachhawn ṭumin 2-1 in an chak lo a, Kolkata club an chungnung zawk. Match hmasa berah hian AFC-in mual lai aṭangin an khingpui ṭhiah an tum a, an hlawhchham - goal hlauhawm pawh an nei meuh lo.

Dutch manager Erol Akbay-a'n match khat chauh a enkawl zawhah mimal harsatna avangin a inhnukdawk a, Mizo coach B. Malsawmzuala kutah mawhphurhna dah a ni.

Sawmtea leh Dutch manager danglamna chu Mizo coach hian Mizo player-te a hrechiang zawk a, India ram football kalhmang a hre ṭha zawk. Sreenidi Deccan an hmachhawn hma hian Sawmtea'n Vanglani hnenah mual sir aṭanga an nawr tur thu leh 100% passing game khelh a rem loh thu a sawi lawk.

Tharpuia Goal

AFC-in player an thlak hret a, goalkeeper-ah Goan tlangval Nora Fernandes an hmang. Captain Lalmuanawma (Munez) kawppui Serbian defender Ivan Maric a inhliam avangin Republic Veng tlangval hi Brazilian defender Gustavo nen an inkawp.

Lunglei rawlthar duhawm Laldanmawia, Mohun Bagan midfielder hlui Sheikh Sahil leh Aizawl FC chhul chhuak K. Lalhmangaihkima te bul ṭantir an ni bawk. Mohammedan an hmachhawn ṭum aiin Aizawl FC khel a nung tawh zawk a, an khingpui Sreenidi Deccan hian match hnihah goal riat khung mah se Aizawl FC tlarhnung an su nghing meuh lo.

Aizawl FC-in an chakna an hria a, season liam taa an player ṭha pahnih R. Lalthanmawia (Amawia) leh Tharpuia te chu mual sirah awmin hman ṭangkai dan an zawng. Minute 26-naah midfielder talent nei ṭha K. Lalrinfela'n Tharpuia tan through ball ṭha zet a pe a, Inter Village Football 2022-a Luvara tia hriat lar Tharpuia hian vawi khatah pet nghalin goal kilah tak a pet lut.

Goal venhim hna, goal ropui leh red card

Mizo club hian I League-ah tawnhriat an nei ṭha tawh a, point hmuh harsat dan an hria. Champion rinkai leh season liam taa pahnihna Sreenidi Deccan lakah a harsa dawn tih a chiang lehzual.

AFC-in second half-ah goal venhim hna an thawk a, player tinin an tih tur an hria - tlarhma hmasa bera awm Lalrinzuala aṭangin pressure an pe dik hle. Coach Sawmtea'n tha thar an mamawh tih a hria a, hun chanve hnu lamah hian goal venhim thiam midfielder Lalthankhuma (TK-a) leh KC Larchhuakmawia te a luhtir.

Sreenidi pawhin goal khung tumin second half-ah hian R. Lalbiakliana leh B. Lalnuntluanga te an luhtir a, Mizo club tan ven sen vek a ni lo. Substitute Ibrahim Sissoko-a'n hun ṭha a insiam a, keeper Nora-a'n a dang hlauh. Sreenidi striker chhanvawr David Castañeda Muñoz pawhin goal pawnah chiah a hun ṭha neih chu a tauh chhuak bawk.

Hun tawp lamah Sreenidi lamin ball an vawrh nasat avangin Gustavo lenna a ṭangkai a, Aizawl FC player-ten an theihna zawng zawng an chhuah bawk avangin goal an chhuah lo. Injury time minute khatnaah Rohmingthanga goal ropui khung hmangin AFC-in 2-0 inhma an hruai. Awlsam taka chak tura ngaih ni mah se goal khung lawma kawr phelhtu Rohminga hian yellow card a hmu a, a hnu minute nganaah yellow card vawi hnihnaah a hmuh vangin hnawhchhuah a ni.

Sreenidi-in freekick hmang ṭangkaiin Pawan Kumar hmangin siphurh an sut ṭhen a, nuam sain Aizawl FC an chak lo - thawhrimna leh inpekna zawng zawng nen an chak. Injury time minute 12 zet an khelh zawhah referee-in huntawp hamrik a ham a, Aizawl FC 2-1 in an chak hram.