Diaz-a pa rututen intiamkam an duh

Liverpool forward Luis Diaz-a pa Luis Manuel Diaz rubotu National Liberation Army (ELN) chuan Manuel Diaz chu an chhuah dawn a nih chuan, an chhuah hmaa an pawl himna sorkarin a tiam phawt an phut thu an sawi.

Luis Diaz-a pa hi October 28 khan a nupui nen Barrancas, Colombia aṭangin silaia vau chunga ruk bo an ni a, a nu hi rubotute hian car-ah hnutchhiah zuiin, a pa erawh an kawl chhunzawm a ni.

ELN chuan Diaz-a pa chu a rang lama chhuah an duh thu an sawi a, chutihrual chuan Colombia sorkar hmalakna chuan Diaz-a pa chhuah zalen tura an hmalakna ṭhenkhat chu a tiṭhuanawp niin an sawi.

Diaz-a pa rubotu ELN commander Jose Manuel Martinez Quiroz chuan, "Sorkar sipaite nena intibuai lo turin hma kan la a, mahse, sorkar lam hian sipai tam tak dahin, nasa takin hma a la a, Diaz-a pa hmu thei chu sum pek an tiam hial a ni.

"Hetiang taka sorkar hmalakna hian him dam taka Manuel Diaz chhuah kan tumna a tikhawtlai a, hetianga hma an lak reng chuan Diaz-a pa kan chhuah zalenna tur hi an tikhawtlai zel dawn tihna a ni," a ti.

Quiroz chuan sawi zawmin, "Diaz te chhungkua hrehawm tihna hi kan hrethiam em em. Sorkar lam a inrawlh lo a nih chuan kan chhuah zalen ang, kan tih hi kan dinna a la ni reng a, chak taka hma kan lak theih nana him taka hmalak theih a nih thu tiam kan duh bawk a ni," a ti a, chetsual an hlau.

Kum 26 mi Diaz hi Nottingham Forest nen inkhel tura a inpeih vek hnuah a nu leh pa ruk bo an nih thu hrilh a ni a, squad aṭangin a inhnukdawk. Reds tan match hnih a khelh loh hnuah ama duhthlannain training a zawm a, Pathianni zan khan Premier League-ah Luton Town a hmachhawn.

Colombian forward hian he inkhelah hian goal a khung zui a, a kawr hnuaia thuziak pholangin a goal khung a lawm a, "Ka pa tan zalenna" tih chu a kawrah hian a inziak.

Diaz hian inkhelh zawhah ruk bo mek a pa chhuah zalen turin a ngen zui a, kum 26 mi forward chuan, "Second tin, minute tin hian rilru hah reng rengin hun kan hmang a ni ber.

"Ka nu leh ka unaute nen hrehawm kan ti a, kan hrehawmna hi thua sawifiah kan thiam lo. Inah kan hnenah ka pa hi awm se, hrehawm kan tihna hi chu a reh chauh ang. Ka pa hi rang taka inchhuah zalen ka ngen a, hrehawm taka a hun hman hi titawp rawh u.

"Hmangaihna leh khawngaihna hmingin ka ngen che u a, ka pa hi lo hawtir hram rawh u," a ti a, Colombia leh khawvel hmun hrang hrang amiten an tawrhpuina avangin lawmthu a sawi bawk.